Një armë e gjatë në dorë dhe katër mbi tavolinë: fotoja në rrjete e çon policinë te një 24-vjeçar

Një armë e gjatë e mbajtur në dorë dhe katër të tjera të vendosura mbi një tavolinë. Kjo fotografi, e publikuar në rrjete sociale, ka mjaftuar që Policia e Kosovës të nisë trajtimin e rastit dhe të identifikojë një 24-vjeçar në Prishtinë.

Pas trajtimit të informatës lidhur me fotografinë, i riu është shoqëruar në Stacionin Policor Veriu. Ai është intervistuar në cilësinë e të dyshuarit, në praninë e avokatit mbrojtës.

Për rastin është njoftuar prokurori kujdestar, i cili ka udhëzuar që të iniciohet procedurë për veprën "Mbajtje në pronësi, kontroll ose posedim të paautorizuar të armëve". Pas intervistimit, 24-vjeçari është liruar në procedurë të rregullt.

Nuk është bërë e ditur nëse armët e shfaqura në fotografi janë sekuestruar.

I dyshuari prezumohet i pafajshëm derisa fajësia të mos vërtetohet me vendim të formës së prerë të gjykatës.