Nismë për referendum: kërkohen 10 mijë nënshkrime për fatin e Specialës

Fati i Dhomave të Specializuara të Kosovës dhe i Zyrës së Prokurorit të Specializuar kërkohet të vendoset me votë qytetare. Instituti Shqiptaro-Evropian dhe Oda Ekonomike Shqiptare kanë njoftuar se së shpejti nisin mbledhjen e 10 mijë nënshkrimeve për të vënë në lëvizje procedurën kushtetuese dhe ligjore të një referendumi për këtë çështje.

"Instituti Shqiptaro-Evropian dhe Oda Ekonomike Shqiptare njoftojnë qytetarët e Republikës së Kosovës se së shpejti do të fillojmë mbledhjen e 10,000 nënshkrimeve qytetare për inicimin e procedurës kushtetuese dhe ligjore për një referendum lidhur me të ardhmen e Dhomave të Specializuara të Kosovës dhe Zyrës së Prokurorit të Specializuar", thuhet në njoftimin e dy organizatave.

Sipas nismëtarëve, qëllimi është që çështja të trajtohet përmes mekanizmave demokratikë, kushtetues dhe institucionalë. Ata kërkojnë nga Kuvendi i Republikës së Kosovës shqyrtimin e procedurës dhe të përputhshmërisë së saj me Kushtetutën, përfshirë nenin 162, si dhe me detyrimet ndërkombëtare të Republikës së Kosovës.

Për mënyrën se si do të zhvillohet aksioni, njoftimi është i shkurtër: "Mbledhja e nënshkrimeve do të zhvillohet në hapësira publike të përcaktuara për këtë qëllim. 10,000 nënshkrime për një proces demokratik dhe institucional".

Data, ora dhe lokacionet ku qytetarët do të mund të nënshkruajnë ende nuk janë bërë publike. Organizatorët kanë premtuar se këto detaje do të njoftohen së shpejti.