Bllokadë institucionale në Kosovë: Haxhiu kërkon dialog politik në takimin me ambasadorin britanik

Dalja nga bllokada institucionale në Kosovë ishte tema kryesore e një takimi mes ushtrueses së detyrës së Presidentes së Republikës, Albulena Haxhiu, dhe ambasadorit të Mbretërisë së Bashkuar në Kosovë, Jonathan Hargreaves.

Sipas njoftimit të Presidencës, të dy palët diskutuan zhvillimet e fundit politike dhe situatën institucionale në vend, duke u ndalur te nevoja për dialog politik dhe përpjekjet për të gjetur një zgjidhje për ngërçin aktual.

Haxhiu theksoi rëndësinë që institucionet e vendit të formohen sa më parë dhe në përputhje me rendin kushtetues, në mënyrë që Kosova të vazhdojë përpara. Ajo vlerësoi gjithashtu mbështetjen e vazhdueshme të Mbretërisë së Bashkuar, duke e cilësuar atë partner të rëndësishëm të vendit.