Nga Negroci në Hagë, pritja e verdiktit: "Sot atje është fati i Kosovës"

Dita e aktgjykimit në Gjykatën Speciale në Hagë ka gjetur Kosovën në pritje të ankthshme. Në vendlindjen e Jakup Krasniqit, në Negroc, familjarë, bashkëluftëtarë dhe bashkëvendas u mblodhën për të pritur verdiktin ndaj ish-krerëve të UÇK-së, të bindur, si u shprehën, se Krasniqi dhe bashkëluftëtarët e tij Hashim Thaçi, Kadri Veseli e Rexhep Selimi do të shpallen të pafajshëm.

Vëllai i tij, Avdyl Krasniqi, u shpreh se lufta e UÇK-së ishte e pastër dhe se, sipas tij, nuk ka arsye që ish-krerët e saj të dënohen. "Obligimin njerëzor e kanë kryer me kohë për Kosovë dhe popullin e saj. Gjykata ka qenë jo shumë serioze, pasi edhe dëshmitarët kanë qenë jo seriozë, por shpresojmë që gjykata të mbështetet në fakte dhe të marrë vendimin e duhur. Arsye për t'u dënuar nuk ka, pasi krimet monstruoze i ka kryer Serbia", theksoi ai.

Në Hagë, para se të hynte në objektin e Gjykatës Speciale, djali i Jakup Krasniqit, Altini, ishte i shkurtër: "Besoj se vendimi do të jetë lirues". Ai tha se pret që Thaçi, Veseli, Krasniqi dhe Selimi të lirohen nga akuzat e të kthehen të lirë në Kosovë, por shtoi se qëndrimi i tij nuk varet nga verdikti. "Besoj se vendimi do të jetë lirues. Cilido që të jetë vendimi, unë jam krenar për secilin, për UÇK-në dhe për çdo gjë çka kanë bërë për neve… Për neve dhe për këta është një mbështetje e madhe që populli është me UÇK-në. Diçka çka dëshirojmë është që populli me ditur vlerën e UÇK-së", u shpreh ai.

Nga Skenderaj, kryetari i komunës, Sami Lushtaku, e përshkroi ditën si pikë kthese për vendin. "Asnjëherë nuk kam pasur emocione më shumë se sot, sepse sot atje është fati i Kosovës. Cila do të jetë rruga e Kosovës pas këtij vendimi, po flas për ata që e dinë çka është shteti dhe çka janë institucionet e këtij vendi. Nuk po flas për ata që i kanë shërbyer dhe vazhdojnë t'i shërbejnë dikujt tjetër", deklaroi Lushtaku për RTV Dukagjini.

I pyetur nëse besonte se ish-krerët e UÇK-së do të lirohen, përgjigjja e tij mbeti e ndarë mes shpresës dhe mosbesimit: "Unë shpresoj dhe besoj gjithmonë, por jam me dyshime që pak ka drejtësi atje."

Përmbajtja e aktgjykimit të Gjykatës Speciale ndaj katër të akuzuarve nuk ishte bërë e ditur në momentin e këtyre deklaratave, që u dhanë pak para shpalljes së vendimit, një proces që po përcillet me vëmendje të madhe në Kosovë.