Pas thikës në kabinë, flydubai pezullon fluturimet Dubai, Tel Aviv

Kompania ajrore flydubai ka ndërprerë fluturimet mes Dubait dhe Tel Avivit, një ditë pas tentativës për rrëmbimin e një avioni që po udhëtonte drejt Izraelit. Vendimi ka lënë qindra izraelitë të bllokuar në Emiratet e Bashkuara Arabe.

Ndërkohë, prokurorët emiratas kanë hapur hetim për ngjarjen, në qendër të së cilës është bashkëpiloti i fluturimit, i dyshuar se goditi me thikë kapitenin e tij ndërsa avioni ishte në ajër. Prokuroria e Emirateve ka pretenduar juridiksion mbi rastin, megjithëse krimi prek njëkohësisht edhe Arabinë Saudite dhe Izraelin. Çfarë e shtyu sulmuesin të vepronte mbetet ende e paqartë.

Pasojat në bord ishin dramatike. Sulmi e futi avionin Boeing 737 MAX në një rënie të pjerrët me hundë poshtë, gjatë së cilës ai humbi 15 mijë këmbë lartësi në më pak se një minutë. Forca e rënies shkëputi edhe një pjesë të timonit vertikal nga bishti i avionit.

Kapiteni indian Smit Machchhar, edhe pse i plagosur rëndë, nuk u dorëzua. Ai kundërluftoi dhe arriti të hapte derën e kabinës së pilotimit, duke u dhënë mundësi pasagjerëve dhe ekuipazhit ta mbërthenin sulmuesin.

Shpëtimi erdhi edhe nga një rastësi operative. Në bord ndodheshin dy pilotë rezervë, të vendosur aty për rastin kur devijimet e rrugës për shkak të situatës në rajon do ta shtynin ekuipazhin fillestar përtej kufijve të lejuar të orarit të punës. Ata morën drejtimin e avionit dhe e devijuan drejt Tabukut, në Arabinë Saudite.

Pas uljes, autoritetet saudite ndaluan bashkëpilotin dhe morën në pyetje pasagjerët dhe anëtarët e ekuipazhit për rreth shtatë orë. Vetëm më pas një avion zëvendësues i transportoi ata në Tel Aviv, ndërsa tani hetimi për një krim që përfshin tre shtete zhvillohet nën drejtimin e prokurorëve emiratas.