Nëntë vjet burg në Gjermani për 18-vjeçarin nga Kosova: goditi me thikë mësuesen e tij

Nëntë vjet burgim: ky është dënimi që Gjykata e Lartë Rajonale e Dyseldorfit i shqiptoi një 18-vjeçari nga Kosova, të shpallur fajtor për një varg sulmesh me thikë në Essen, të cilat gjykata i cilësoi si të motivuara nga ideologjia islamiste.

I riu u shpall fajtor të martën, më 22 shtator, për dy raste të tentativës për vrasje dhe për lëndim të rrezikshëm trupor, bëri të ditur një zëdhënëse e gjykatës. Në vendim u mor parasysh edhe një dënim i mëparshëm për të mitur, i shqiptuar nga Gjykata e Qarkut në Essen. Vendimi ende nuk është i formës së prerë.

Me nëntë vjet, gjykata iu përmbajt kërkesës së Prokurorisë Federale. Dënimi mbetet vetëm një vit nën maksimumin prej dhjetë vjetësh që mund t'u shqiptohet të miturve. Trupi gjykues urdhëroi gjithashtu që i dënuari të vendoset në një institucion për terapi sociale, ndërsa, bazuar në vlerësimin se ai mund të kryejë edhe vepra të tjera të rënda penale, nuk përjashtohet mundësia e ndalimit preventiv pas vuajtjes së dënimit.

Sipas gjykatës, i riu kishte zhvilluar një qëndrim radikal islamist përmes internetit dhe kishte vendosur të vriste mësuesen e tij kujdestare në një shkollë profesionale, si dhe të sulmonte sa më shumë persona të besimit hebre në Sinagogën e Vjetër në Essen. Ai i ka pranuar veprat dhe ka deklaruar se mësuesja e kishte fyer Profetin Muhamed.

Sulmet ndodhën në shtator të vitit të kaluar, kur ai ishte ende 17 vjeç. Sipas rindërtimit të ngjarjeve, fillimisht sulmoi dhe plagosi kujdestarin e një shkolle fillore, ku kishte kryer orë shërbimi në komunitet. Më pas shkoi te shkolla profesionale në Essen dhe goditi me thikë mësuesen e tij: gruaja pësoi plagë në kraharor që i rrezikuan jetën.

Pas kësaj u nis drejt Sinagogës së Vjetër në Essen. Qëllimi i tij, sipas Prokurorisë së Përgjithshme Federale, ishte të vriste sa më shumë persona hebrenj. E gjeti objektin të mbyllur dhe, në vend të tij, sulmoi me thikë një person të pastrehë në një stacion autobusi, duke e plagosur rëndë dhe duke i rrezikuar jetën.

Vargut të sulmeve i dha fund policia, që e ndaloi të riun në një park aty pranë pasi ai nxori thikën. Sipas aktakuzës, 18-vjeçari synonte të vdiste si "martir" nga të shtënat e policisë. Një pjesëtar i policisë e qëlloi me armë automatike, duke e goditur në fytyrë; i riu mbeti i plagosur rëndë dhe më pas u arrestua.