Nënshkrime për seancë të jashtëzakonshme: opozita kërkon zhbërjen e Gjykatës Speciale

Pesë orë pas vendimit të Gjykatës Speciale, në Kuvendin e Kosovës ka nisur mbledhja e nënshkrimeve për një seancë të jashtëzakonshme me një pikë të vetme të rendit të ditës: zhbërjen e kësaj gjykate.

Nismën e kanë ndërmarrë deputetë të partive opozitare, të cilët kërkojnë që seanca të mbahet në afat të përshpejtuar. Sa nënshkrime janë mbledhur deri tani dhe cilët deputetë kanë nënshkruar, ende nuk është bërë e ditur publikisht.

Kërkesa për shpërbërjen e gjykatës me seli në Holandë ka ardhur edhe nga ish-emisari amerikan për dialogun Kosovë-Serbi, Richard Grenell. "Duhet vepruar shpejt për ta shpërbërë këtë Gjykatë të huaj. Anëtarët e Parlamentit duhet të punojnë me Kurtin që kjo të ndodhë. Kosovës nuk i duhet një gjykatë në Holandë", ka shkruar ai, duke iu referuar kryeministrit Albin Kurti.

Reagimet kanë ardhur menjëherë pas vendimit të Gjykatës Speciale, të cilin Grenell e ka cilësuar skandaloz. Ndër zërat publikë që janë shprehur pas vendimit janë edhe Ramush Haradinaj, i cili është përpjekur t'i qetësojë qytetarët, si dhe Britania e Madhe, e cila i ka kërkuar Kosovës ta ruajë qetësinë.