Negociatorët ukrainas nisen drejt SHBA-së për bisedime dyditore me të dërguarit e Trumpit

Një delegacion i nivelit të lartë ukrainas do të ulet të premten dhe të shtunën në Shtetet e Bashkuara me të dërguarit e presidentit amerikan Donald Trump, në një përpjekje të re për të gjetur një rrugëdalje nga lufta në Ukrainë. Njoftimin e dha të enjten presidenti ukrainas, Volodimir Zelenski, para gazetarëve.

"Delegacioni ukrainas duhet të takojë nesër në Shtetet e Bashkuara Jared Kushnerin dhe Steve Witkoffin. (…) Takimi pritet të zgjasë dy ditë", tha Zelenski. Ai shtoi se Kievi synon të "llogarisë gjithashtu në pjesëmarrjen e një ekipi evropian" në këto bisedime.

Ekipi që Ukraina dërgon në tryezë përbëhet nga katër figura të rëndësishme të pushtetit: shefi i kabinetit të Zelenskit, Kirilo Budanov, ish-ministri i Mbrojtjes, Rustem Umerov, si dhe dy zyrtarë të tjerë të lartë, Sergij Kislicja dhe David Arakhamia.

Bisedimet zhvillohen në hijen e një vale të rëndë sulmesh. Sipas presidentit Zelenski, goditjet ruse të ditëve të fundit mbi disa qytete ukrainase kanë vrarë 78 njerëz dhe kanë plagosur 215 të tjerë.

Vetëm të enjten, sulmet mbi kryeqytet lanë katër të vdekur dhe të paktën 19 të plagosur, sipas kryetarit të Kievit, Vitali Kliçko. Në mbrëmjen e po asaj dite, pjesa më e madhe e lagjeve të Kievit ishte pa energji elektrike si pasojë e bombardimeve, njoftoi Ministria ukrainase e Energjisë. Ndërprerjet goditën edhe furnizimin me ujë dhe transportin publik, ndërsa ministria u bëri thirrje banorëve që ende kishin rrymë ta kufizonin konsumin.

Në Zaporizhzhja, në juglindje të vendit, një burrë u vra dhe dy persona të tjerë u plagosën nga një goditje ruse pranë një ndërtese banimi, njoftoi herët të premten në Telegram kreu i administratës ushtarake rajonale, Mihajlo Semikin.

Nga Uashingtoni, kreu i diplomacisë amerikane, Marco Rubio, e cilësoi të enjten "ngërçin" aktual në konflikt si "shumë të rrezikshëm". "Njëri nga kampet, ose të dy, do ta intensifikojnë atë që po bëjnë për të tentuar ta thyejnë kundërshtarin dhe t'i japin fund ngërçit", paralajmëroi ai.