Në pritje të verdiktit të Hagës, "Liria ka emër" hap konferencën "Lufta për UÇK-në"

Gjashtë vjet gjyq, dhe tani pritja e fjalës së fundit. Në prag të shpalljes së verdiktit final nga Dhomat e Specializuara në Hagë për Hashim Thaçin, Kadri Veselin, Jakup Krasniqin dhe Rexhep Selimin, po mbahet konferenca kombëtare "Lufta për UÇK-në", e organizuar nga platforma qytetare "Liria ka emër".

Konferencën e hapi përfaqësuesja e platformës, Eliza Hoxha, e cila theksoi se për gjashtë vjet ky proces gjyqësor ka qenë pjesë e pandashme e vëmendjes publike në Kosovë.

"Kjo konferencë vjen si moment për ta nisur një dialog të brendshëm për vlerat tona të vërteta, për historinë tonë, për pikat tona të përbashkëta edhe nëse nuk pajtohemi, por duhet të jenë aty për t'i vlerësuar dhe adresuar", tha ajo.

Nëpërmjet tri paneleve të diskutimit, organizatorët synojnë të rikthejnë vëmendjen te narrativa që procesi gjyqësor në Hagë ka pasur për historinë e vendit, për kujtesën kolektive të popullit të Kosovës dhe për luftën e UÇK-së.

Paneli i parë i është dedikuar temës "Konteksti i ri i krijuar nga Dhomat e Specializuara", të cilën po e shtjellojnë Enver Hasani, Ylber Hysa dhe Enver Hoxhaj.

Katër të akuzuarit para Dhomave të Specializuara në Hagë presin verdiktin final, data e shpalljes së të cilit nuk është bërë e ditur. Deri në vendimin e gjykatës, ata ruajnë prezumimin e pafajësisë.