Ndërrimi i foshnjave në Spitalin Amerikan 2: inspektorja e rastit në Komision Disiplinor

Rasti i foshnjës së ndërruar në Spitalin Amerikan 2 ka kaluar nga dera e maternitetit te zyrat e vetë inspektorëve. Ministria e Shëndetësisë ka bërë të ditur se, pas shqyrtimit të mënyrës si u trajtua rasti, janë gjetur mangësi edhe në punën e zyrtarëve të Inspektoratit Shëndetësor.

Masat i ka marrë Kryeinspektori Shëndetësor. Inspektorja që e kishte në dorë rastin është referuar në Komisionin Disiplinor, ku do të shqyrtohet shkelja e dyshuar. Zyrtarit të arkivit i është shqiptuar vërejtje me shkrim, ndërsa përgjegjësi i Inspektoratit ka marrë vërejtje me gojë.

"Pas shqyrtimit të mënyrës së trajtimit të rastit, janë evidentuar mangësi edhe në veprimet e zyrtarëve të Inspektoratit Shëndetësor. Për këtë, Kryeinspektori Shëndetësor ka ndërmarrë këto masa", thuhet në përgjigjen e Ministrisë.

Ngjarja daton më 18 mars 2026, kur një nëne iu dorëzua një foshnjë që nuk ishte e saj, vetëm pak orë pas lindjes, dhe Inspektorati i dha spitalit vetëm vërejtje me shkrim, pa gjobë.

Sipas Ministrisë, inspektimi në spital nxori në pah mangësi në procedurat e identifikimit dhe të verifikimit të foshnjës në momentin e dorëzimit te nëna. Kontrolli i dokumenteve tregoi gjithashtu se infermierja e përfshirë, megjithëse ka licencë të vlefshme pune, nuk ishte e deklaruar në sistemin e Departamentit të Licencimit dhe Akreditimit (DLA).

"Ministria shpreh keqardhje për shqetësimin dhe pasigurinë e shkaktuar familjes së prekur. Institucionet përgjegjëse do të monitorojnë zbatimin e masave dhe rekomandimeve", u shpreh institucioni.

Nga ana e tij, spitali, që është në pronësi të një kompanie nga Shqipëria, është përgjigjur se shqetësimet e "klientëve" trajtohen me përkushtim të veçantë dhe se po e hulumton rastin. Nuk dihet nëse spitali ka marrë ndonjë masë ndaj stafit të vet.