ReklamëHapësirë reklame
ReklamëHapësirë reklame
Reklamë
Aleanca Veriatlantike thotë se e pranon aktgjykimin ndaj katër ish-krerëve të UÇK-së, të dënuar me gjithsej 81 vjet burgim, duke kujtuar se vendimi mund të ankimohet. Në Kosovë, reagimet ndaj vendimit vijojnë, mes tyre kritika nga një ish-hetuese e ICTY-së.
Një ditë pas aktgjykimit të shpallur në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, të dënuar me gjithsej 81 vjet burgim, NATO ka dalë me një qëndrim të matur: e pranon vendimin, por kujton se ai nuk është përfundimtar.
"Ne e pranojmë aktgjykimin e Dhomave të Specializuara të Kosovës dhe marrim parasysh se vendimi i gjykatës është subjekt i ankesës", thotë një zyrtar i NATO-s, në përgjigjen e dhënë për Klan Kosova. Aleanca ka theksuar se respekton proceset dhe vendimet e institucioneve të drejtësisë.
Pjesa tjetër e reagimit ka të bëjë me sigurinë. Zyrtari i Aleancës nënvizoi se Ballkani Perëndimor është rajon me rëndësi strategjike dhe se qëndrimi i NATO-s nuk luhatet nga zhvillimet gjyqësore. "Përkushtimi ynë për të garantuar stabilitetin është i palëkundur. Këtë e dëshmojnë aktivitetet tona të vazhdueshme, veçanërisht misioni ynë paqeruajtës në Kosovë, KFOR-i", deklaroi ai.
Sipas NATO-s, misioni paqeruajtës mbetet i gatshëm për të përmbushur mandatin e tij. "KFOR-i është i mirëpozicionuar dhe mbetet plotësisht i përqendruar në zbatimin e mandatit të tij afatgjatë të Kombeve të Bashkuara, i bazuar në Rezolutën 1244 të Këshillit të Sigurimit të OKB-së, të vitit 1999, duke kontribuar në ruajtjen e një mjedisi të sigurt dhe të qëndrueshëm për të gjithë njerëzit që jetojnë në Kosovë, si dhe në garantimin e lirisë së lëvizjes, në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili në përputhje me rolin e vet si reagues në fushën e sigurisë", thuhet në përgjigjen e Aleancës. Dënimet individuale për secilin nga të dënuarit nuk jepen në reagimin e NATO-s.
Ndërkohë, aktgjykimi ka nxitur kritika edhe nga studiuesja, profesoresha, autorja dhe ish-hetuesja e Tribunalit për Krime Lufte në ish-Jugosllavi (ICTY), Nevenka Tromp. Një ditë pas vendimit, në një intervistë për KosovaPress me gazetarin Besart Maloku, ajo foli për dimensionin njerëzor të dënimeve dhe pasojat politike të vendimit, për rolin e Thaçit në krijimin e Dhomave të Specializuara, për bashkëpunimin e tij, për procesin e apelit dhe për shfrytëzimin që, sipas saj, Serbia mund t'i bëjë aktgjykimit, duke e përdorur atë si mjet lufte kundër Kosovës.
Tromp zgjodhi të nisë nga përjetimi personal i katër të dënuarve, me argumentin se drejtësia duhet të shihet para së gjithash në raport me individët. "Para së gjithash, përshtypja ime e parë, duke e ndjekur leximin e aktgjykimit dhe shpalljen e vendimit, ishte se sa jashtëzakonisht e dhimbshme duhet të ketë qenë për katër të akuzuarit që ishin ulur aty duke dëgjuar dhe, në fund, duke e dëgjuar vendimin. Dhe ne gjithmonë duhet t'i kthehemi këtij dimensioni njerëzor, sepse, e dini, tani të gjithë po flasin me fjalë të mëdha: si ndikon kjo në Kosovë, si ndikon në marrëdhëniet me Serbinë? Por, në thelb, drejtësia është në radhë të parë dhe duhet parë në raport me individët", thotë ajo.
Ajo rikujtoi se tre prej të dënuarve ishin studentë kur vendosën t'i bashkoheshin luftës, duke ndërprerë jetën që kishin. "Pra, shikojini këta katër njerëz. Tre prej tyre ishin studentë kur ndërprenë normalitetin e jetës së tyre, madje erdhën edhe nga jashtë, për të luftuar për vendin e tyre, madje jo vetëm për vendin e tyre, por për motrat dhe vëllezërit e tyre, për nënat dhe gratë e tyre. Dhe e bënë këtë kur kishin mundësinë të ktheheshin prapa dhe të bënin diçka tjetër. Pra, a mund ta imagjinoni të jeni në vijën e parë të luftës dhe, në fund, ta fitoni këtë luftë me gjithë botën, me vendet e NATO-s që ju mbështetnin?", thotë Tromp.
Sipas saj, çmimi i këtyre zgjedhjeve po paguhet dekada më vonë. "Dhe pastaj, pas luftës, filloni të punoni për shtetësinë e Kosovës dhe përfundoni duke paguar çmimin për zgjedhjet që i keni bërë si një i ri në të njëzetat e jetës. Pra, e gjithë jeta e tyre iu kushtua një kauze të madhe dhe ata sakrifikuan aq shumë në raport me familjet dhe fëmijët e tyre. Dhe tani përballen, sigurisht, kur bëhet fjalë për Thaçin dhe Jakup Krasniqin, i cili është pak më i moshuar se të tjerët, me 25 vjet burgim, që de facto është dënim i përjetshëm", shprehet ajo.
Tromp kritikoi edhe disa deklarata të kryetarit të trupit gjykues, Charles Smith, duke e cilësuar ironik referimin që ia bëri aktgjykimit me formulën "në emër të popullit të Kosovës". Ajo përmendi po ashtu protestat e qytetarëve që kundërshtuan vendimin e Dhomave të Specializuara.
Pas aktgjykimit të shkallës së parë, reagimet politike dhe institucionale në Kosovë kanë vijuar: Organizata e Veteranëve të Luftës së UÇK-së (OVL-UÇK) ka prezantuar një Platformë Veprimi, ndërsa Albin Kurti dhe Hamza janë takuar për të diskutuar hapat e mëtejmë.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
