NATO i përgjigjet Vuçiçit për urën mbi Ibër: Tranzicioni bëhet me “transparencë të plotë”

Selia e NATO-s në Bruksel doli me një sqarim publik për urën kryesore mbi lumin Ibër në Mitrovicë, një ditë pasi presidenti i Serbisë, Aleksandar Vuçiç, i kërkoi sekretarit të përgjithshëm të Aleancës, Mark Rute, të “mos lejojë hapjen e urës mbi Ibër”.

Nga NATO-ja nuk hynë në përmbajtjen e kërkesës së Vuçiçit, duke u kufizuar te formulimi se Rute është “në kontakte të rregullta me presidentin Vuçiç”. Në vend të kësaj, Aleanca ripërsëriti arsyet pse KFOR-i ka nisur tranzicionin gradual të pranisë së tij të përhershme në urë.

Sipas një zyrtari të NATO-s, ndryshimet në praninë e KFOR-it po zbatohen me “transparencë të plotë” dhe me përfshirjen e palëve relevante. “KFOR-i ka filluar tranzicionin gradual të pranisë së tij të përhershme në urën kryesore në Mitrovicë, në përputhje me përmirësimin e situatës së sigurisë në Kosovë. Kjo është pjesë e procesit të optimizimit të pranisë së KFOR-it, që zhvillohet me transparencë të plotë me të gjitha palët e përfshira dhe me udhëheqjen gjithëpërfshirëse të komandantit të KFOR-it, gjeneralmajor Ulutash”, tha zyrtari.

Ai theksoi se procesi është “gradual, i bazuar në kushte dhe i kthyeshëm” nëse situata e sigurisë do ta kërkonte këtë. NATO-ja shtoi se ai është “i koordinuar ngushtë me të gjithë pjesëmarrësit relevantë, përfshirë përfaqësuesit e institucioneve në Kosovë dhe organizatat ndërkombëtare, si dhe Policinë e Kosovës dhe Misionin e BE-së për sundimin e ligjit – EULEX”.

Mes aktorëve të njoftuar, NATO-ja përmendi edhe Listën Serbe, me të cilën komandanti i KFOR-it, gjeneralmajor Ulutash, u takua më 11 gusht, sipas kërkesës së saj.

Aleanca nënvizoi se largimi i pikës së përhershme të KFOR-it nga ura nuk nënkupton tërheqjen e misionit nga Mitrovica. Personeli, sipas saj, mbetet i shpërndarë ashtu që të reagojë ndaj çdo zhvillimi relevant, në përputhje me mandatin e KFOR-it të bazuar te Rezoluta 1244 e Këshillit të Sigurimit të OKB-së. KFOR-i do të ruajë një “prani të dukshme” si në veri, ashtu edhe në jug të Mitrovicës.

Për vetë hapjen e urës për automjete, NATO-ja qëndroi e kujdesshme: “Çdo vendim i mundshëm për rihapjen e urës për automjete duhet të marrë parasysh nevojat e të gjitha komuniteteve lokale.”

Vetë Vuçiçi kishte bërë të ditur se ia kishte dërguar letrën Rutes, me të cilin, sipas tij, kishte pasur një bisedë të rëndësishme në margjinat e samitit të Parisit. “Sapo i dërgova një letër sekretarit të përgjithshëm të NATO-s, Mark Rute, me të cilin kohët e fundit pata një bisedë të rëndësishme në margjinat e samitit të Parisit, dhe i kërkova që NATO të mos lejojë hapjen e urës mbi Ibër”, tha ai.

Tranzicioni në terren ka nisur konkretisht. Nga ana veriore u hoq pika statike shumëvjeçare e karabinierëve italianë, ndërsa ushtruesi i detyrës së ministrit të Punëve të Brendshme, Xhelal Sveçla, njoftoi se po fillon procesi në të cilin përgjegjësia për sigurinë e urës kalon te Policia e Kosovës, me hapjen e saj për qarkullim si përfundim i pritur.