NATO 3.0 dhe KFOR-i në riorganizim: çfarë pret afro 600 ushtarët amerikanë në Kosovë?

Afro 600 ushtarë amerikanë shërbejnë sot në Kosovë, por askush nuk mund të thotë me siguri se sa do të zgjasë kjo prani në formën e tanishme. NATO-ja ka nisur riorganizimin e KFOR-it, pikërisht në një kohë kur Aleanca po rimendon ndarjen e barrës për sigurinë e kontinentit.

Në qendër të këtij rimendimi është vizioni i quajtur NATO 3.0. Ai parashikon më shumë përgjegjësi për mbrojtjen e Evropës dhe një rol të ri për Shtetet e Bashkuara, një zhvendosje që mund të sjellë ndryshime në praninë ushtarake amerikane në kontinent.

Për Kosovën, dy proceset priten të ndërthuren: nga njëra anë ristrukturimi i KFOR-it, nga ana tjetër ripërcaktimi i rolit amerikan brenda Aleancës. Mbetet e paqartë se si do të ndikojnë këto zhvillime te kontingjenti amerikan në vend, ndërsa nuk janë bërë publike as afatet, as hapat konkretë të riorganizimit të KFOR-it.