Natë sulmesh mbi Ukrainën: tetë të vrarë, dy anije të goditura në Detin e Zi

Tetë persona u vranë në Ukrainë pas një vale të gjerë sulmesh ruse me raketa, dronë dhe artileri, ndërsa Moska pretendoi se goditi dy anije tregtare në Detin e Zi. Valës së sulmeve iu përgjigj edhe Polonia, që ngriti avionë luftarakë dhe kaloi sistemet e saj të mbrojtjes ajrore në gatishmëri maksimale.

Forcat Ajrore të Ukrainës njoftuan të shtunën se gjatë natës vendi u godit nga 174 dronë, të nisur nga territori rus dhe nga Gadishulli i Krimesë i aneksuar nga Rusia, si dhe nga dy raketa antianije Zircon të lëshuara nga rajoni rus i Kurskut. Sipas njoftimit të publikuar në Telegram, mbrojtja ajrore rrëzoi ose bllokoi elektronikisht 141 objektiva, me rrëzime të regjistruara në 15 vendndodhje dhe me rënie mbeturinash në nëntë të tjera. "Raketat [antianije Zircon] armike nuk i arritën objektivat", thuhet në deklaratë.

Ministria ruse e Mbrojtjes pretendoi se forcat e saj përdorën dronë endacakë të tipit Geran-4 Seeker për të goditur dy anije tregtare në Detin e Zi: një anije ukrainase transporti me ngarkesë të thatë në rrugë drejt Odesës dhe një tanker të ankoruar në portin e Odesës. Ministria pohoi se të dyja anijet transportonin furnizime ushtarake.

Bilanci më i rëndë erdhi nga rajoni i Harkivit. Guvernatori i rajonit, Oleh Siniehubov, konfirmoi se sulmet ruse prekën 14 vendbanime, duke vrarë pesë persona dhe duke plagosur 15 të tjerë, me shkatërrime të rënda në qytete si Balaklija dhe Lipkuvativka.

Në rajonin e Hersonit, guvernatori Oleksandr Prokudin tha se granatimet mbi 25 komuna vranë tre persona dhe plagosën pesë të tjerë. Sipas tij, u dëmtuan ndërtesa banimi shumëkatëshe, shtëpi private, një shtyllë antenash celulare dhe një tubacion gazi.

Rajoni i Dnipropetrovskut u përball me mbi dhjetë sulme të veçanta në katër zona. "Dy persona u plagosën. Armiku sulmoi katër zona më shumë se 10 herë me dronë, artileri dhe bomba ajrore", tha drejtuesi i administratës rajonale, Oleksandr Ganzha. Sulmet dëmtuan depo në Dnipro, një poliklinikë në Pavllohrad, një qendër tregtare në Nikopol dhe disa banesa në Krivi Rih e Sinelniki.

Ndërkohë, Komanda Operacionale e ushtrisë polake njoftoi të shtunën në rrjetin X se kishte nisur fluturime ushtarake brenda hapësirës ajrore kombëtare, duke përmendur aktivitet intensiv të dronëve rusë në afërsi. "Në lidhje me goditjet e kryera nga Federata Ruse me mjete ajrore pa pilot me motor reaktiv mbi territorin e Ukrainës, kanë nisur operacionet e aviacionit ushtarak në hapësirën ajrore polake", thuhet në deklaratë. Komanda shtoi se kishte "aktivizuar të gjitha forcat dhe mjetet e nevojshme që ka në dispozicion" dhe se "sistemet tokësore të mbrojtjes ajrore dhe të zbulimit radar kanë arritur gjendjen më të lartë të gatishmërisë".

Në një njoftim pasues, komanda polake bëri të ditur se operacioni i shkurtër përfundoi pak më vonë dhe se njësitë e mbrojtjes ajrore tokësore dhe ato radarike u kthyen në detyrat e zakonshme. Sipas saj, nuk pati asnjë shkelje të hapësirës ajrore, ndërsa forcat e armatosura mbetën në gatishmëri dhe vazhduan të monitorojnë situatën përtej kufirit.