Nafta në 105 dollarë, Tramp mbledh liderët e Gjirit në New York për fundin e luftës me Iranin

Një tubacion i mbyllur në Arabinë Saudite, nafta mbi 100 dollarë për fuçi dhe bisedime armëpushimi që nuk lëvizin: me këtë sfond, presidenti i SHBA-së, Donald Tramp, pritet të takohet të martën e ardhshme me liderët e vendeve të Gjirit, në kulisat e Asamblesë së Përgjithshme të OKB-së në New York, për të diskutuar hapat e mëtejshëm të luftës me Iranin. Planin e takimit e bëri publik të enjten portali Axios.

Në tavolinë pritet të ulen liderët e gjashtë vendeve të Këshillit të Bashkëpunimit të Gjirit: Arabia Saudite, Emiratet e Bashkuara Arabe, Katari, Bahreini, Kuvajti dhe Omani. Lista e të ftuarve mund të zgjerohet edhe me lidera të tjerë arabë dhe muslimanë. Departamenti amerikan i Shtetit i dërgoi ftesat e para të mërkurën, sipas personave me njohuri për çështjen të cituar nga Axios.

Fokusi i bisedimeve, sipas të njëjtit raport, do të jenë propozimet amerikane për një strategji të pasluftës. Tramp dhe ekipi i tij i lartë punojnë mbi një plan për "ditën e nesërme", i cili nuk pritet të finalizohet para zgjedhjeve të mesmandatit në SHBA në nëntor. Çfarë do të kërkojë konkretisht Uashingtoni nga vendet e Gjirit apo nga Irani në këtë aranzhim të pasluftës, mbetet e papërcaktuar.

Edhe kryeministri izraelit, Benjamin Netanyahu, dëshiron një takim me Trampin në New York, por asnjë takim i tillë nuk është caktuar deri tani, sipas një burimi izraelit të cituar në raportin e Axios.

Të mërkurën, Tramp pohoi se Irani ka kontaktuar drejtpërdrejt Uashingtonin dhe dëshiron një marrëveshje, duke e përshkruar gjendjen e luftës si pranë përfundimit. "Ata duan të bëjnë një marrëveshje, dhe do të shohim se si funksionon kjo", u tha gazetarëve sapo zbriti në Karolinën e Veriut.

Presioni ekonomik mbi vendet e Gjirit po rritet. Arabia Saudite mbylli tubacionin Lindje-Perëndim, rrjetin strategjik që transporton naftë të papërpunuar nga bregu lindor i mbretërisë drejt portit të Janbuit në Detin e Kuq, pas dëmeve të shkaktuara nga një atak me dron. Vendet e Gjirit kanë përballuar në ditët e fundit atakime në rritje nga Irani dhe nga militantët hutitë të aleancuar me Iranin, të cilët kanë çrregulluar eksportet energjetike.

Tregjet reaguan të mërkurën: çmimet e naftës së papërpunuar zvogëluan rritjet e mëparshme pasi Arabia Saudite raportohet se organizoi ngarkesa shtesë përmes portit Sohar në Oman, me transferime nga anija në anije, gjë që lehtësoi frikën për një hendek të zgjatur në furnizim. Nafta Brent u lehtësua në 105,8 dollarë për fuçi, ndërsa West Texas Intermediate shënoi rënie prej 0,22 për qind, në 102,14 dollarë.

Të mërkurën, sekretari i përgjithshëm i OKB-së, António Guterres, përsëriti thirrjet për deeskalim në rajon, duke kërkuar diplomaci dhe rikthimin e lirisë së lundrimit në Ngushticën e Hormuzit.