Nafta deri në 1.94 euro, MINTI: Nuk është vërejtur abuzim me çmimet

Diferenca mes çmimit me të cilin nafta hyn në Kosovë dhe atij që qytetarët paguajnë në pompë është rreth 10 centë. Sipas të dhënave zyrtare të Doganës së Kosovës, çmimi i importit të derivateve të naftës për 24 orët e fundit ka qenë 1.83 euro, ndërsa raportet e Inspektoratit Qendror të Mbikëqyrjes së Tregut (IQMT) tregojnë se në pompat e derivateve çmimi i shitjes ka lëvizur nga 1.92 deri në 1.94 euro.

Për benzinën, çmimi i importit për të njëjtën periudhë 24-orëshe është 1.54 euro, me një çmim të shitjes me pakicë që ka lëvizur nga 1.61 deri në 1.67 euro.

Ministria e Industrisë, Ndërmarrësisë, Tregtisë dhe Inovacionit (MINTI) bën të ditur se IQMT në vazhdimësi është duke bërë monitorimin e çmimeve të derivateve të naftës në territorin e Republikës së Kosovës dhe se, për momentin, nuk ka shkelje të konstatuara. "Bazuar në çmimet e importit të deklaruara nga Dogana e Kosovës, deri më tani, nuk është vërejtur ndonjë abuzim me çmimin e shitjes së derivateve", thuhet në njoftimin e ministrisë.

Njëkohësisht, MINTI lë të hapur mundësinë e një ndërhyrjeje administrative në treg. Sipas ministrisë, në momentin kur vëren dhe verifikon se ka abuzim me çmime nga kompanitë e shitjes së derivateve, do të shqyrtohet mundësia e rikthimit të vendimit për përcaktimin e marzhës tregtare maksimale të lejuar për shitje me shumicë.

Arsyen e rritjes së çmimeve ministria e vendos jashtë tregut vendor. Sipas MINTI-t, shtrenjtimi i derivateve nuk vjen si rrjedhojë e lëvizjeve të çmimit brenda vendit, por si pasojë e përshkallëzimit të konfliktit në Lindjen e Mesme dhe rrjedhimisht rritjes së çmimit në furnizim. Ministria u siguron konsumatorëve se ka mbikëqyrje të plotë të tregut dhe se monitorimi i çmimeve do të vazhdojë.