Mungonin masat e sigurisë: ndalohen punimet në katër kantiere në Gjakovë, Ferizaj e Gjilan

Katër objekte ndërtimi në Gjakovë, Ferizaj dhe Gjilan kanë mbetur pa punë pasi Inspektorati Qendror i Punës vendosi t'i ndalojë përkohësisht punimet, për shkak të parregullsive në sigurinë dhe shëndetin në punë.

Dy nga kantieret ndodhen në komunën e Gjakovës, ndërsa nga një në Ferizaj dhe në Gjilan. Sipas Inspektoratit, kontrollet në terren konstatuan se në këto objekte mungonin masat e nevojshme për të garantuar sigurinë e punëtorëve, gjë që çoi në nxjerrjen e vendimeve për ndalim. Inspektorati nuk ka bërë publike emrat e subjekteve që zhvillojnë punimet.

Ndalimi mbetet në fuqi derisa të eliminohen të gjitha mangësitë e evidentuara dhe të krijohen kushte të sigurta për punë.

Institucioni paralajmëroi se kontrollet do të vazhdojnë dhe se do të merren masa ndaj çdo subjekti që nuk respekton kërkesat ligjore për sigurinë dhe shëndetin në vendin e punës. Njëkohësisht, Inspektorati u bëri thirrje të gjithë punëdhënësve t'i zbatojnë me përpikëri standardet e sigurisë, për të parandaluar aksidentet dhe për të mbrojtur jetën dhe shëndetin e punëtorëve.