Muja në Kuvend: Pesë mostra mishi me parametra shqetësues, dy lidhen me “Apetitin”

Pesë mostra mishi kanë dalë me parametra shqetësues dhe janë dërguar për verifikim jashtë Kosovës. Dy prej tyre lidhen me produktet e kompanisë “Apetiti”, ndërsa tri të tjerat me operatorë të ndryshëm, deklaroi ministri i Bujqësisë, Armend Muja, në Kuvendin e Kosovës.

Muja i dha shifrat duke iu përgjigjur pyetjeve të deputetes së Aleancës për Ardhmërinë e Kosovës, Time Kadrijaj. "Më lejoni t'ju tregoj që deri më tani kemi marrë 240 analiza laboratorike, nga to ne kemi pranuar rezultate për 111 prej tyre, 5 mostra përbejnë parametra shqetësues të cilat i kemi dërguar për verifikim jashtë vendit, 2 nga to ndërlidhen me ‘Apetitin’, tri nga to me operatorë të tjerë. 1.446 dërgesa të mishit të dërguar nga Brazili janë duke u verifikuar një nga një", tha ai.

Verifikimi mbulon çdo dërgesë mishi të importuar nga Brazili gjatë periudhës nga 1 janari deri më 5 shtator. Sipas ministrit, kontrollet nuk janë kufizuar vetëm te “Apetiti”. Ai e cilësoi kompaninë si një ndër importuesit më të mëdhenj, por theksoi se rreth 60 për qind e importeve kryhen nga operatorë të tjerë, të cilët po ashtu po u nënshtrohen analizave dhe verifikimeve.

Çështja mori vëmendje pasi autoritetet e Malit të Zi ndaluan një ngarkesë prej 103 tonësh mish viçi të ngrirë, për shkak të dyshimeve lidhur me afatin e skadimit dhe etiketimin. Muja pranoi në Kuvend se institucionet e Kosovës mësuan për rastin fillimisht nga mediat. Sipas tij, informimi për çështjen erdhi më 15 shtator, ndërsa të nesërmen, më 16 shtator, Autoriteti i Ushqimit dhe Veterinarisë (AUV) kontaktoi autoritetin përkatës malazez për të kërkuar informacione.

Përgjigjja nga Podgorica, sipas ministrit, i drejtoi ata te një tjetër institucion. "Na kanë njoftuar se çështja po trajtohet nga Dogana e tyre, jo nga Autoriteti i Ushqimit. Ne kemi pranuar informacionet e para, të cilat konfirmojnë dyshimet që autoritetet i kanë pasur se në këto dërgesa ka pasur, ose ka dyshime për ndërrim të etiketave. Deri më tani këtë informacion e kemi nga autoritetet e Malit të Zi", tha Muja.

Raporti zyrtar i autoriteteve malazeze ende pritet. Pavarësisht procedurave që zhvillohen atje, Muja tha se Kosova ka ndërmarrë hapin e vet: "Që nga shtatori kemi urdhëruar kontroll 100 për qind të çdo dërgese".

Shpjegimet e ministrit nuk e qetësuan deputeten Kadrijaj. Ajo reagoi duke i thënë Mujës se nuk ka të drejtë të helmojë popullin me mish të skaduar dhe ngriti pyetjen për fatin e kompanisë: "A do ta fusni në listën e zezë kompaninë Apetiti? Edhe një ministër, se kompanitë vendore po i sulmoni me krejt arsenalin që e keni si qeveri. Njëjtë siç keni vepruar me fabrikën e qumështit ‘Vita’ që për çdo ditë ka qenë atak i kësaj kompanie..."