MSH mohon se pacientja me kancer vdiq pa terapi dhe publikon kronologjinë e trajtimit

Ministria e Shëndetësisë (MSH) i hedh poshtë pretendimet se një pacientje me kancer ndërroi jetë sepse nuk e mori terapinë. Zëdhënësi i Ministrisë, Durim Elshani, i cilësoi si të pasakta disa nga raportimet për vdekjen e saj dhe paraqiti kronologjinë e trajtimit, të mbështetur, sipas tij, në raportin klinik dhe në ekzaminimet diagnostike.

Sipas MSH-së, gjashtë vjet më parë pacientja ishte diagnostikuar me kancer të gjirit të tipit trefish negativ dhe i kishte përfunduar me sukses kimioterapinë e radioterapinë. Sëmundja u rikthye për herë të dytë në dhjetor të vitit 2025, me metastaza në kocka dhe në omentum. Rasti u rishqyrtua nga Konsiliumi i Klinikës së Onkologjisë dhe, meqë analizat e reja rezultuan hormon-pozitive metastatike, mjekët vendosën një linjë të re trajtimi me medikamentet Palbociclib dhe Fulvestrant (Faslodex).

Thelbi i reagimit të Ministrisë lidhet me furnizimin me ilaçe. Sipas dokumentacionit të paraqitur nga Elshani, më 13 maj 2026 pacientja u furnizua me Palbociclib në sasi të mjaftueshme për trajtim të plotë deri më 13 qershor 2026. Në këtë periudhë, ekzaminimet treguan se sëmundja kishte përparuar më tej në kocka. Gjatë qershorit dhe korrikut, sipas MSH-së, Konsiliumi e vazhdoi pa asnjë shkëputje trajtimin e kombinuar me të dy medikamentet, në cikle të rregullta mujore.

Në gusht të vitit 2026 pacientja vazhdoi të merrte të njëjtën terapi. Megjithatë, ekzaminimet shtesë vërtetuan metastaza të reja në tru dhe në boshtin kurrizor. Ministria e paraqet këtë si argumentin kryesor të saj: "Kjo e dhënë e patjetërsueshme shkencore e hedh poshtë aludimet se sëmundja ka progresuar si pasojë e mosmarrjes së terapisë."

Në fazën e fundit, sipas MSH-së, tumori kishte zhvilluar rezistencë biologjike ndaj terapisë së parë dhe Konsiliumi vendosi ndryshimin urgjent të linjës terapeutike, duke kaluar te Capecitabine dhe te radioterapia paliative në tru, me qëllim kontrollin e tumorit dhe lehtësimin e simptomave. Organizmi i pacientes nuk e toleroi trajtimin dhe ajo ndërroi jetë. "Të gjitha këto etapa dhe vendime klinike janë të dokumentuara dhe të vërtetuara në raportet mjekësore zyrtare, gjë që i hedh poshtë tërësisht pretendimet e pabazuara se pacientja ka vdekur për shkak të mosmarrjes së terapisë", thuhet në reagim.

Ministria nuk e bën publik identitetin e pacientes. "Për shkak të respektimit strikt të konfidencialitetit dhe Ligjit për Mbrojtjen e Të Dhënave Personale, identiteti nuk do të bëhet publik, mirëpo ftojmë të gjitha palët e autorizuara dhe organet kompetente që dëshirojnë të verifikojnë këtë ecuri, se dosja e plotë mjekësore është e qasshme për rishikim në Klinikën e Onkologjisë", deklaroi Elshani.

Zëdhënësi u bëri thirrje edhe mediave që të respektojnë dhimbjen e familjes dhe të mos e lidhin shkakun e vdekjes me mungesën e terapisë pa pasur dokumentacion.