Motor kundër monopatine në Kavallë: dy miq shqiptarë humbin jetën brenda një nate

Një përplasje mes një motori dhe një monopatine elektrike në Nea Peramos të Kavallës, në Greqi, u ka marrë jetën dy shqiptarëve, të cilët raportohet se ishin miq të ngushtë.

Aksidenti ndodhi mbrëmjen e djeshme në rrugën që lidh Nea Peramos me zonën e Ammolofoit. Goditja ishte tepër e rëndë. Drejtuesi i motorit, një 34-vjeçar, humbi jetën nga plagët e marra.

I riu 36-vjeçar, që udhëtonte me monopatinën elektrike, u dërgua në gjendje të rëndë në Spitalin e Përgjithshëm të Kavallës. Atje mjekët e futën në sallën e operacionit, por ai nuk i mbijetoi plagëve dhe ndërroi jetë gjatë orëve të para të mëngjesit, duke e çuar bilancin në dy të vdekur.

Autoritetet greke kanë nisur hetimet për të përcaktuar dinamikën e përplasjes dhe shkaqet e sakta të saj, të cilat ende nuk janë bërë të ditura.