Morina mbushet me udhëtarë nga Kosova, nga 30 shtatori rikthehen kontrollet kufitare

Moti i pafavorshëm nuk e zbehu lëvizjen drejt Shqipërisë. Edhe këtë fundjavë, në Pikën e Kalimit Kufitar të Morinës u vërejt një rritje e numrit të qytetarëve të Kosovës që kaluan kufirin, me lëvizje që nisën që në orët e para të ditës.

Pavarësisht fluksit, udhëtarët thonë se nuk ka pasur vonesa në kalim.

Regjimi i kalimit do të ndryshojë nga 30 shtatori. Me përfundimin e sezonit veror, atë ditë në Morinë rikthehen kontrollet kufitare, raporton RTSH. Procedura do të zbatohet deri më 1 nëntor, periudhë gjatë së cilës kontrollet do të kryhen sipas procedurave përkatëse.

Morina mbetet një nga nyjet kryesore të lëvizjes mes Kosovës dhe Shqipërisë edhe pas verës, ndërsa autoritetet do të vijojnë monitorimin e fluksit të udhëtarëve dhe zbatimin e procedurave kufitare.