Molotovë kundër policisë pranë selisë së PS-së: efektivë të kapur nga flakët

Shishet me lëndë djegëse fluturuan drejt kordonit të policisë pranë selisë së Partisë Socialiste (PS), dhe disa efektivë përfunduan të përfshirë nga flakët. Më keq se të tjerët është plagosur një oficer.

Përplasja e ashpër ndodhi edhe pse zona ishte mbuluar nga gazi lotsjellës. Policia kishte hedhur gaz në sasi masive pranë Sheshit Skënderbej, me synimin për të shpërndarë turmën, por protestuesit qëndruan dhe u përballën me efektivët pranë godinës së PS-së.

Nuk dihet ende sa policë u prekën nga flakët, as sa e rëndë është gjendja e oficerit të plagosur. Po ashtu, nuk ka të dhëna nëse ka persona të shoqëruar apo të arrestuar pas sulmit me molotovë.

Ky është përshkallëzimi më i rëndë i revoltës deri tani. Më herët, në ditën e saj të 12-të, protesta ishte shoqëruar me ujë me presion dhe gaz lotsjellës para Ministrisë së Arsimit, ku policia ndërhyri për të larguar protestuesit. Tani, me efektivë të djegur dhe një oficer me plagë më të rënda, tensioni është zhvendosur drejt selisë së partisë në pushtet.