Mitrovicë: Peci nis shkëputjen e 27 kontratave për pronat komunale deri në 99 vjet

Njëzet e shtatë kontrata për pronat e Komunës së Mitrovicës janë vënë në procedurë shkëputjeje. Vendimin e ka bërë të ditur kryetari i Komunës, Faton Peci, i cili thotë se disa nga përfituesit e këtyre pronave nuk kanë investuar asgjë, edhe pse kanë kaluar vite nga marrja e tyre në shfrytëzim.

Sipas Pecit, kontratat janë lidhur për periudha deri në 99 vjet. Ai pohon se një pjesë e tyre ka tejkaluar çdo afat të paraparë për realizimin e investimeve, ndërsa në disa raste, deri në dhjetë vjet, nuk është investuar asnjë mjet në pronat publike të marra në përdorim.

Kryetari e ka shoqëruar njoftimin me një mesazh me nënkuptim politik. "Prona e Komunës nuk është për anëtarë të partisë, por për interesin e ekonomisë", ka shkruar Peci. Ai ka shtuar se "të gjitha pronat publike do të jenë në dispozicion për të gjithë, pa dallime e favorizime".

Peci nuk ka dhënë hollësi se për cilat prona bëhet fjalë, kush janë përfituesit e kontratave apo kur janë lidhur ato.