Mitrovicë e Veriut: kryesuesi ia ndërpret fjalën asamblistes shqiptare për pronat e Trepçës

"Jo, të lutem, mos më prek." Me këto fjalë asamblistja Aida Ferati-Doli iu kundërvu kryesuesit të Kuvendit Komunal të Mitrovicës së Veriut, Ivan Zaporozhac, në një seancë që u kthye në përplasje të ashpër për rendin e ditës, pronat e ndërmarrjes "Trepça" dhe të drejtën e asamblistëve shqiptarë për të folur.

Gjithçka nisi kur asamblisti Marko Jakshiq kërkoi që në rendin e ditës të shtohej një pikë për situatën aktuale në veri dhe zhvillimet në Mitrovicën e Veriut. Ai përmendi arrestimin e nëntë personave në Zubin Potok dhe pretendimin për ndalimin e punimeve në një projekt të komunës, duke kërkuar që Kuvendi t'i diskutojë këto zhvillime dhe të miratojë një deklaratë me qëndrimin e tij.

Ferati-Doli reagoi menjëherë. Sipas saj, çështjet e ngritura nga Jakshiq nuk duhet të lidhen me pronat e "Trepçës" mbi baza politike apo etnike. "Ndërmarrja ‘Trepça’, e cila punon dhe vepron në Mitrovicë, ka prona edhe në komuna të tjera", tha ajo, duke shtuar se pronësia e ndërmarrjes është dëshmuar edhe në gjykatë. "Kështu që iu kisha lutur, zotëri Jakshiq, mos i ndërlidhni çështjet politike duke dashur t’i ktheni në etnike."

Zaporozhac ia ndërpreu fjalën, me arsyetimin se tema nuk ishte pjesë e rendit të ditës. "Kjo tash nuk është në rendin e ditës dhe nuk mund të flasim…", u dëgjua të thoshte ai. Ferati-Doli nuk u tërhoq: "Në rend të ditës jam, as zoti Jakshiq nuk ishte në rendin e ditës." Ajo e ktheu debatin në një akuzë të drejtpërdrejtë ndaj kryesuesit: "Pse gjithmonë ndodh kjo, na ndërpritni fjalën te unë ose te kolegu shqiptar asamblist?" Dhe më pas iu drejtua publikut: "Mediat duhet parë që asamblistëve shqiptarë u ndërpritet fjala. Asnjë tjetri nuk iu ndërpritet fjala, nuk është në rregull, absolutisht".

Në mbështetje të saj doli edhe asamblisti i Partisë Demokratike të Kosovës, Emir Azemi, i cili kritikoi mënyrën si po drejtohej seanca. Sipas tij, kur një koleg propozon një pikë të re, kryesuesi "nuk duhet ta keqpërdorni pozitën", por duhet t'i hapë rrugë debatit. "Thjesht duhet të lejoni debat. Besoj që është gjë elementare që si kryesues duhet ta dini", tha Azemi, duke kujtuar se as atij nuk i ishte dhënë fjala në mbledhjen e kaluar.

Zaporozhac e mbrojti vendimin e tij. Sipas kryesuesit, Jakshiq u paraqit për të kërkuar plotësim të rendit të ditës, ndërsa Ferati-Doli foli vetëm për t'iu përgjigjur atij, gjë që sipas tij do t'i linte të tjerët pa të drejtë replike. "Sikur ajo të ishte paraqitur për të propozuar një pikë të rendit të ditës, plotësim të rendit të ditës, nuk do t’ia kisha hequr fjalën. Sjellja e saj ishte joprofesionale", deklaroi ai.

Kryesuesi i hodhi poshtë edhe akuzën për trajtim të ndryshëm etnik. "Unë e udhëheq këtë mbledhje ekskluzivisht në përputhje me ligjin", tha Zaporozhac, duke shtuar: "I kam hequr fjalën edhe kolegëve këshilltarë nga Lista Serbe".