Mish i skaduar nga Brazili për tregun e Kosovës, Mali i Zi ndal tre kontejnerë në Bar

Në frigoriferët e Portit të Barit, doganierët malazezë gjetën atë që nuk duhej të kalonte kurrë kufirin: tre kontejnerë me mish të ngrirë viçi me origjinë nga Brazili, me afat përdorimi të skaduar, të nisur drejt tregut të Kosovës. Transiti u ndalua dhe ngarkesa u vendos nën mbikëqyrje doganore.

Sipas njoftimit të Qeverisë së Malit të Zi, autoritetet dyshojnë se etiketat origjinale të produkteve ishin hequr dhe ishin zëvendësuar me etiketa të falsifikuara, që shfaqnin një afat të ri përdorimi. Rasti doli në pah gjatë kontrolleve të intensifikuara të mallrave në Njësinë Doganore të Portit të Barit.

Drejtoria e Doganave ka bërë të ditur se kontejnerët ishin të destinuar për një blerës nga Kosova, i identifikuar në njoftim vetëm me inicialet A….ShpK. Gjatë kontrollit të mëtejshëm në një frigorifer të portit, doganierët konstatuan se punëtorë të angazhuar nga një kompani nga Kosova dyshohet se kishin hequr etiketat origjinale të vendosura mbi produktet.

Hetimi nuk ndalet te ngarkesa e bllokuar. Autoritetet malazeze thonë se po verifikojnë nëse produkte të kësaj kompanie nga Kosova kanë arritur edhe te subjekte të tjera afariste në Mal të Zi. Sipas të dhënave që kanë në dispozicion institucionet, një numër biznesesh malazeze që merren me përpunimin e mishit furnizohen me produkte nga i njëjti person juridik nga Kosova.

Pikërisht për këtë arsye janë nisur verifikimet për të përcaktuar faktet relevante dhe përmasat e mundshme të shpërndarjes së mallit. Deri në përfundimin e tyre, dyshimet mbeten dyshime dhe asnjë përgjegjësi nuk është vërtetuar nga një vendim gjyqësor.