Minutat e fundit para aktgjykimit: lot në Skënderaj, thirrje për lirim para Speciales

Në minutat që ndanin Kosovën nga aktgjykimi i Gjykatës Speciale në Hagë ndaj katër ish-krerëve të UÇK-së, kryetari i Skënderajt, Sami Lushtaku, foli i emocionuar dhe në lot. Ai pranoi se ka frikë nga vendimi që mund të merret, por theksoi se beson në pafajësinë e ish-krerëve të UÇK-së.

"Frika është gjithmonë edhe pse unë nuk i besoj kësaj drejtësie nuk na mbetet diçka tjetër. I pres të lirë çlirimitarët, megjithatë jam mes emocioneve dhe asaj çka do të ndodhë", tha Lushtaku.

Para objektit të Gjykatës Speciale në Hagë, ministri i Punëve të Jashtme dhe Diasporës, Glauk Konjufca, deklaroi se pritet vetëm një përfundim: "një aktgjykim lirues për katër ish-krerët e UÇK-së". Sipas tij, lufta ishte e domosdoshme mbrojtëse dhe kishte për qëllim "atë të lirisë për popullin tonë".

"Ky verdikt është një aktgjykim lirues për katër ish-krerët e UÇK-së. Lufta jonë ishte një luftë e domosdoshme mbrojtëse dhe kishte një qëllim 'atë të lirisë për popullin tonë' dhe 'stopimin e gjenocidit duke e kryer në atë kohë forcat ushtarake, policore edhe paramilitare të Serbisë'. Ky nuk është vetëm një konstatim subjektiv i popullit tonë, por këtë gjatë procesit e dëshmuan si dëshmitar edhe personalitetet më të shquara ndërkombëtare. Prej gjeneralit amerikan të NATO-s Wesley Clark, e deri te zëvendëssekretari i jashtëm amerikan, ishin dhjetëra figura ndërkombëtare që dëshmuan luftën e drejtë mbrojtëse të popullit të Kosovës. Ajo luftë u zhvillua nga UÇK-ja. Këtë UÇK e drejtoi shtabi i përgjithshëm. Dhe në shtabin e përgjithshëm nuk ka pasur asnjëherë ndonjë mekanizëm të përbashkët kriminal", tha Konjufca.

Pak minuta para shpalljes së aktgjykimit, Partia Demokratike e Kosovës publikoi një mesazh në rrjetet sociale: "Ora e historisë. Besojmë, ora e lirisë. UÇK, për jetë e mot!". Postimi erdhi pak para nisjes së seancës në të cilën pritet të bëhet i ditur vendimi për Hashim Thaçin, Kadri Veselin, Rexhep Selimin dhe Jakup Krasniqin.

Shpallja e vendimit po përcillet me vëmendje të madhe në Kosovë. Familjarë, bashkëluftëtarë dhe mbështetës të ish-krerëve të UÇK-së janë mbledhur për ta ndjekur zhvillimin e seancës në Hagë, ndërsa përmbajtja e aktgjykimit mbetet e panjohur deri në leximin e tij në sallë.