Ministria e Infrastrukturës në flakë, policia shpërndan protestuesit me gaz në Tiranë

Flakët përfshinë Ministrinë e Infrastrukturës dhe Energjisë në Tiranë, pasi protestuesit i vunë zjarrin godinës në ditën e gjashtë të protestës kundër qeverisë. Zjarrfikëset mbërritën në vend dhe po punojnë për të shuar flakët.

Policia reagoi menjëherë pas zjarrit. Efektivët hodhën gaz lotsjellës për të shpërndarë turmën dhe përdorën edhe plumba gome. Nën presionin e tyre, protestuesit u tërhoqën drejt Sheshit Skënderbej, ndërsa ende nuk dihet nëse ka të lënduar, të arrestuar apo sa janë dëmet në godinë.

Dikasteri i përfshirë nga zjarri është drejtuar nga Belinda Balluku, ish-ministrja e Infrastrukturës dhe Energjisë, e cila përballet me një sërë akuzash të rënda për korrupsion. Si çdo i akuzuar, Balluku gëzon prezumimin e pafajësisë deri në një vendim përfundimtar të gjykatës.

Zjarri erdhi pas një dite me përplasje të ashpra në qendër të kryeqytetit. Protestuesit hodhën fishekzjarre dhe molotovë drejt efektivëve. Ata nuk e braktisën terrenin: largoheshin për pak kohë dhe riktheheshin pranë kordonëve të policisë për t'i qëlluar sërish.

Gjatë gjithë ditës pati përballje frontale mes protestuesve dhe efektivëve, në një Tiranë që për të gjashtën ditë radhazi është shndërruar në skenë kaosi.