Milano në flakë: mbi 200 të ndaluar, 80% të mitur, Meloni thërret mbledhje emergjente

Gurë kalldrëmi, kosha plehrash dhe karrige që fluturonin drejt policëve, përgjigjur me gaz lotsjellës dhe autobotë uji: kjo ishte pamja e Milanos gjatë fundjavës, kur protestat kundër rritjes së kostos së jetesës u kthyen në trazira. Më shumë se 200 persona u ndaluan dhe, sipas mediave italiane, 80 për qind e tyre ishin të mitur.

Kryeministrja italiane, Giorgia Meloni, pritet të drejtojë të hënën një mbledhje emergjente për sigurinë.

Në rrugët e qytetit u mblodhën gjatë fundjavës mbi 5000 njerëz. Shumë prej protestuesve ishin me maska. Përleshjet nisën të shtunën dhe vazhduan gjatë gjithë së dielës. Ka pasur të plagosur, mes tyre edhe policë, por numri i tyre nuk është bërë ende i ditur.

Prokuroria e Milanos ka kërkuar dënime me burg për pesë të rritur, të arrestuar për plaçkitje, vandalizëm dhe rezistencë ndaj arrestimit.

"Të demonstrosh është e drejtë. T'i kthesh qytetet tona në rrënoja nuk është", deklaroi Meloni të shtunën. Sipas saj, "huliganët" kanë shfrytëzuar protestat për të "mbjellë kaos".

Trazirat nuk mbetën vetëm në Milano. Dhuna mes protestuesve dhe policisë u përhap edhe në qytete të tjera të veriut të Italisë. Në Torino, sipas kryeministres, u ndaluan persona që po mbanin "gurë kalldrëmi dhe çekiçë për thyerjen e xhamave". Në Bolonjë, një stacion treni u mbyll si masë paraprake pas trazirave të ngjashme.

Kryetari i Bashkisë së Milanos, Giuseppe Sala, u shpreh i shqetësuar se po përballet me një "fenomen të ri", i cili "e ka zanafillën në një skenar ndërkombëtar dhe për rrjedhojë ushqen vetveten". Ai tregoi se kishte parë me sytë e tij "vitrina të thyera, dyqane të plaçkitura dhe qytetarë të frikësuar", duke shtuar se "ajo që ndodhi këtu është ajo që po shohim në shumë qytete anembanë botës".

Ngjarjet morën shpejt edhe ngjyrim politik. Meloni, e cila përballet me zgjedhje vitin e ardhshëm, u bëri thirrje kundërshtarëve të saj politikë që t'i dënojnë trazirat. "Mos jini të paqartë për këtë", shkroi ajo në rrjetin X, duke këmbëngulur se dënimi duhet të jetë "unanim", sepse "çdo hezitim kthehet në justifikim".

Liderja e Partisë Demokratike, Elly Schlein, u përgjigj se partia e saj e ka dënuar gjithmonë dhunën. Sipas saj, trazirat nuk duhet të përdoren për të shuar zërin e protestuesve paqësorë në mbarë vendin, të cilët po luftojnë për të siguruar jetesën.

Shpërthimi i dhunës erdhi pas protestave antiqeveritare që studentët mbajtën të premten në disa qytete italiane. Trazirat në Itali ngjajnë me ato në Francën fqinje, ku gjatë fundjavës mbi gjysmë milioni njerëz dolën në rrugë kundër shtrenjtimit të jetesës dhe ku dhuna shpërtheu në shumë qytete. Në Limozh, në jug të Francës, një bashki historike u dogj gjatë protestave kombëtare.