Merz i shkruan Kurtit: Gjermania mbetet fuqishëm në krah të Kosovës

Kancelari federal i Gjermanisë, Friedrich Merz, i ka dërguar një letër urimi Albin Kurtit për rizgjedhjen e tij në postin e kryeministrit të Kosovës. Mesazhi nuk mbetet te urimi protokollar: Merz e lidh mandatin e ri me nevojën për të kapërcyer ndarjet partiake dhe për të çuar përpara reformat.

Në letër, kancelari gjerman u ndal te muajt e fundit të pasigurisë politike, një periudhë që, sipas tij, ka kërkuar shumë nga Kosova. Konfirmimi i Kurtit në detyrë, vlerësoi ai, krijon hapësirë për zgjidhjen e çështjeve institucionale që kanë mbetur pezull.

"Konfirmimi i zgjedhjes suaj ofron mundësinë për të ndërtuar ura përtej vijave partiake, për të zgjidhur çështjet e mbetura institucionale dhe për të avancuar reformat", shkruan Merz.

Kancelari preku edhe marrëdhëniet me Beogradin. Ai theksoi se përparimi i konsiderueshëm në dialogun për normalizimin e marrëdhënieve me Serbinë, i udhëhequr nga Bashkimi Evropian, mbetet thelbësor.

Letrën e mbylli me një mesazh mbështetjeje për Kosovën: "Gjermania vazhdon të qëndrojë fuqishëm në krah të Kosovës. Ne kemi një miqësi të veçantë me popullin e Kosovës".