"Me dalë nuk ban hiç!": Gucati i pret rrugën deputetes Balje në oborrin e Kuvendit

"Na vjen keq, me dalë nuk ban hiç!" Me këto fjalë, kryetari i Organizatës së Veteranëve të Luftës së UÇK-së, Hysni Gucati, i ka prerë rrugën deputetes Duda Balje, e cila po përpiqej të largohej nga oborri i Kuvendit të Kosovës.

Momenti është kapur në një video të publikuar nga Kallxo.com. Gucati i ka thënë deputetes së komunitetit boshnjak se nuk mund ta lejojnë të dalë, duke i shprehur njëkohësisht respekt. Balje nuk ka kundërshtuar: është kthyer mbrapsht, duke e falënderuar.

Episodi ndodhi ndërsa protestuesit, të vendosur para Kuvendit dhe brenda oborrit të tij, vazhduan edhe sot t'i pengojnë deputetët të dalin nga objekti. Pas largimit të Baljes nga dalja, ata mbetën në hapësirat e Kuvendit.

Në qendër të protestës është Projektligji për ndryshimin e Ligjit për Dhomat e Specializuara dhe Zyrën e Prokurorit të Specializuar. Kuvendi e miratoi atë të hënën në lexim të parë, me 91 vota për. Kërkesa kryesore e protestuesve është që projektligji të procedohet menjëherë dhe të miratohet edhe në lexim të dytë.