ReklamëHapësirë reklame
ReklamëHapësirë reklame
Reklamë
Avokati Rodney Dixon thotë se ekipi mbrojtës i Kadri Veselit është "i shokuar" nga verdikti i Gjykatës Speciale dhe se do ta apelojë si shpalljen fajtor ashtu edhe dënimin, ndërsa para Qeverisë së Kosovës protesta ka hyrë në orën e gjashtë.
Rreth 2000 faqe. Kaq ka, sipas avokatit mbrojtës Rodney Dixon, aktgjykimi i plotë i Gjykatës Speciale ndaj klientit të tij, ish-kreut të PDK-së, Kadri Veseli, i shpallur fajtor dhe i dënuar. Dixon paralajmëroi se çdo faqe do të shqyrtohet me kujdes, në funksion të një ankese që mbrojtja e cilëson të pashmangshme.
"Gjykata këtu për Kosovën ishin vetëm dënime, përfshirë edhe të klientit tim, Kadri Veselit, u shpallën fajtorë dhe u dënuan. Ekipi mbrojtës, në emër të tij, me të vërtetë janë të shokuar nga kjo shpallje fajësie dhe dënimi. Kemi kaluar gjashtë vjetët e fundit duke theksuar që nuk ka dëshmi për të dëshmuar përfshirjen e tij në çfarëdo vrasje a kidnapim… po e shohim etapën e radhës të apelimit të fuqishëm të vendimeve", tha Dixon në emisionin Rubikon të Klan Kosovës, pas aktgjykimit të sotëm.
Sipas tij, elementi që e ka befasuar më shumë mbrojtjen është konstatimi i gjykatës se ekzistonin dëshmi për keqbërje nga ana e Veselit. "Do të na duhet ta shohim me shumë kujdes aktgjykimin e gjatë. Ajo që na habiti në përmbledhje është se gjykata konstatoi se kishte dëshmi për keqbërje nga ana e klientit tim, por ne gjatë procedurës kemi theksuar mungesën e çfarëdo lloj prove në të cilën do të mund të mbështetej, dhe këtë do ta shikoj me shumë hollësi për të ndjekur linjën e ankesës", deklaroi ai.
I pyetur për rolin e Veselit gjatë luftës, duke qenë se ai nuk ka qenë asnjëherë komandant terreni, siç kanë qenë komandantët e tjerë të gjykuar në Kosovë apo në gjykatën për ish-Jugosllavinë, avokati nuk hyri në detaje. "Tani nuk do të futem në hollësitë e provave të sakta dhe pozitës së tij të saktë, dhe si do t'i parashtrojmë këto në apelim. Do të na duhet ta konsiderojmë aktgjykimin si tërësi, por me siguri se do t'i apelojmë në mënyrë të fuqishme gjetjet që janë bërë", tha ai, duke sqaruar se ankesa do të përfshijë si shpalljen fajtor, ashtu edhe dënimin.
Për kohëzgjatjen e procesit, Dixon tha se afatet janë të përcaktuara dhe se nuk duhet pritur një zgjidhje e shpejtë. "Shumë varet nga shqyrtimi i aktgjykimit. Nuk mund të futem në hollësi të sakta, nuk mund të flasim për diçka që do të zgjidhet shpejt sepse rregullat parashohin muaj të tërë që të ndodhë kjo. Por, të gjithë ne do t'i bëjmë parashtresat tona në gjykatë", theksoi ai.
Në përmbledhjen e aktgjykimit u përmend edhe emri i Behadin Hallaqit. Gazetari Kelmendi vlerësoi se ai është i vetmi që u përmend me emër ndër të tjerët e prezantuar në gjetjet e gjykatës. Dixon konfirmoi se ky emër u përmend sot, por qëndroi te linja e mbrojtjes: "nuk kishte dëshmi në dispozicion në të cilat do të mund të mbështeteshin për të dënuar klientin tim lidhur me cilindo nga këto pohime. Kjo ka qenë pozita jonë konsistente gjatë gjithë kohës".
Aktgjykimi ka nxjerrë në rrugë qytetarë në Prishtinë. Protesta para Qeverisë së Kosovës ka vazhduar edhe rreth gjashtë orë pas nisjes së tubimit, me deputetë të PDK-së dhe AAK-së që iu bashkuan protestuesve. Qytetarët e pranishëm kanë vijuar të qëndrojnë para objektit qeveritar, duke u bërë thirrje edhe të tjerëve t'u bashkohen. "Kush s'bashkohet është tradhtar", ka qenë një nga thirrjet e dëgjuara.
Ndërkohë, dënimet e shqiptuara ndaj ish-krerëve të UÇK-së, nga 13 deri në 25 vjet burgim, janë vlerësuar si të larta nga historiania e Universitetit të Utrehtit në Holandë, Iva Vukushiq, njohëse e proceseve gjyqësore për krimet e kryera në ish-Jugosllavi dhe me prejardhje nga Kroacia. "U befasova kur Prokuroria kërkoi 45 vjet burgim dhe mendoj se këto dënime janë mjaft të larta krahasuar me gjykatat e tjera për këto krime. Por, tani është mundësia për ankesë në Apel, kështu që do të shohim se çfarë do të ndodhë", tha ajo për Radion Evropa e Lirë.
Vukushiq thekson se vendimi i Dhomave të Specializuara në Hagë nuk mund ta vërë në pyetje ligjshmërinë e luftës së Kosovës për pavarësi. Në përmbledhjen e aktgjykimit, gjykatësi kryesues Charles Smith tha se Dhomat e Specializuara i përballin me përgjegjësi penale të dënuarit vetëm për krime që ata i kanë kryer individualisht dhe se UÇK-ja nuk po gjykohej, edhe pse shtoi se ata kishin qëllim të përbashkët kriminal. "Gjykim penal i këtij lloji ka të bëjë gjithmonë me individë. Gjithmonë. Me njerëz të caktuar, viktima të caktuara, ditë të caktuara. Me krime të caktuara", thotë historiania.
Sipas saj, vendimi do të interpretohet sipas interesave: njerëzit do ta politizojnë dhe do ta manipulojnë, "dhe viktimat dhe familjet e tyre ndoshta nuk do të përfitojnë nga asnjëra prej këtyre gjërave... Por gjykimi ka të bëjë me atë që kanë bërë këta njerëz, dhe vetëm me këtë". Ajo kujton se detyra e gjyqtarëve ishte e kufizuar: "Bëhet fjalë për një grup të kufizuar krimesh të pretenduara nga Prokuroria, për të cilat gjyqtarët duhej të merrnin një vendim, bazuar në prova dhe në ligj. A i provoi Prokuroria pretendimet përtej çdo dyshimi të arsyeshëm në lidhje me këta individë? Kjo ishte detyra, asgjë më shumë, dhe kjo është ajo që morëm".
Për efektin e aktgjykimit në rajon, Vukushiq është skeptike: "unë e kam shumë të vështirë të parafytyroj se, 30 vjet pas luftërave në ish-Jugosllavi, shumë njerëz në rajon do ta ndryshojnë mendimin për atë që tashmë mendojnë për ato ngjarje, ata aktorë dhe ato krime të 30 vjetëve më parë". Narrativat, sipas saj, janë kryesisht të përcaktuara tashmë, ndërsa krime të ngjashme, përfshirë raste ndaj komandantëve të UÇK-së, janë gjykuar vite më parë nga Tribunali Penal Ndërkombëtar për ish-Jugosllavinë.
Pas aktgjykimit, avokati mbrojtës i ish-presidentit Hashim Thaçi, Pierre-Richard Prosper, kërkoi që NATO-ja dhe Departamenti amerikan i Shtetit ta shqyrtojnë vendimin, pasi gjykata tha se partneri i tyre, UÇK-ja, ishte ndërmarrje kriminale. Vukushiq e sheh këtë si përpjekje për ta politizuar hapur çështjen dhe për të nxitur trysni politike, çka sipas saj nuk është e shëndetshme dhe nuk duhet të lejohet.
Shtetet e Bashkuara, nga ana e tyre, thanë se e respektojnë aktgjykimin e Dhomave të Specializuara ndaj Hashim Thaçit, Kadri Veselit, Jakup Krasniqit dhe Rexhep Selimit dhe u bënë thirrje të gjitha palëve ta pranojnë vendimin e gjykatës.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
