Mbrojtja e Thaçit apelon aktgjykimin: Provat për vrasjen e Allaqit u mbajtën të fshehura

Një rast vrasjeje për të cilin gjykata kishte urdhëruar heshtje publike dhe konfidencialitet të plotë të provave është tani thelbi i apelit që mbrojtja e Hashim Thaçit po përgatit kundër aktgjykimit të shkallës së parë. Avokati kroat Luka Misetic, mbrojtës i ish-presidentit, ka bërë të ditur se aktgjykimi i djeshëm i Trupit Gjykues do të kundërshtohet pranë Panelit të Apelit të Dhomave të Specializuara të Kosovës, me pretendimin se në të janë bërë gabime të rëndësishme ligjore, faktike dhe procedurale, gabime që sipas tij cenojnë drejtësinë e procesit.

Në qendër të ankesës është konstatimi i Trupit Gjykues për përfshirjen e Thaçit në vrasjen e Behajdin Allaqit. Sipas Misetic, gjykata e përmendi publikisht këtë rast pasi më parë kishte urdhëruar të gjitha palët të mos e diskutonin atë në seancë publike dhe pasi kishte vendosur që provat përkatëse të mbahen konfidenciale.

"Mbrojtja argumenton se gjetjet e Trupit Gjykues për fajësinë përtej dyshimit të arsyeshëm mbështeten në prova të pamjaftueshme dhe të pakonfirmuara. Për më tepër, Trupi Gjykues dje deklaroi publikisht se z. Thaçi ishte i përfshirë në vrasjen e Behajdin Allaqit, pasi kishte urdhëruar të gjitha palët në këtë çështje që të mos e diskutonin rastin e z. Allaqi në seancë publike dhe pasi kishte urdhëruar që të gjitha provat lidhur me këtë rast të mbaheshin konfidenciale. Kështu, Trupi Gjykues e ka shpallur publikisht z. Thaçi fajtor për një vrasje, ndërkohë që provat mbi të cilat është bazuar ky përfundim i janë mbajtur të fshehura shqyrtimit publik. Z. Thaçi do ta mirëpriste shqyrtimin publik të këtyre provave. Mbrojtja do t'i apelojë vendimet e Trupit Gjykues për shkelje të të drejtave të tij themelore për një gjykim të drejtë, të garantuara nga Konventa Evropiane për të Drejtat e Njeriut dhe Kushtetuta e Kosovës. Z. Thaçi e mohon shprehimisht çdo përfshirje në vrasje", deklaroi Misetic.

Ankesa e dytë e mbrojtjes ka të bëjë me sjelljen e gjyqtarëve në sallë. Misetic pretendon se anëtarët e Trupit Gjykues kanë ndërhyrë drejtpërdrejt me pyetje ndaj dëshmitarëve dhe palëve, në një shtrirje që, sipas tij, ka krijuar përshtypjen e mungesës së paanshmërisë.

"Gjatë gjithë gjykimit, Mbrojtja ka ngritur vazhdimisht shqetësime lidhur me drejtësinë procedurale, përfshirë shtrirjen e gjerë të pyetjeve të bëra drejtpërdrejt nga anëtarët e Trupit Gjykues, në një mënyrë që nuk krijonte përshtypjen e paanshmërisë. Mbrojtja mban qëndrimin se ndërhyrjet gjyqësore e kanë tejkaluar kufirin e kërkimit neutral të së vërtetës, duke cenuar përshtypjen e paanshmërisë që kërkohet sipas standardeve ndërkombëtare të drejtësisë. Kjo mungesë paanshmërie tashmë përshkon edhe aktgjykimin e Trupit Gjykues", shkroi avokati.

Njoftimi zyrtar i apelit, sipas mbrojtjes, do të dorëzohet pranë Panelit të Apelit. "Respektimi i standardeve rigoroze të drejtësisë procedurale është thelbësor për ruajtjen e besimit të publikut në institucionet ndërkombëtare të drejtësisë penale. Mbrojtja do të dorëzojë zyrtarisht njoftimin e apelit për të korrigjuar këto gabime faktike, ligjore dhe procedurale pranë Panelit të Apelit", shtoi Misetic.