Mbi 50 mijë euro në muaj për asistentët e deputetëve, ndërsa Kuvendi ishte i bllokuar

Një ditë pas betimit, 12 deputetë kishin tashmë asistentë personalë. Kuvendi i Kosovës, ndërkaq, nuk kishte nisur asnjë ditë pune parlamentare dhe nuk do të nisë për më shumë se një muaj.

Gjatë gjithë asaj periudhe, organi legjislativ mbeti i bllokuar në procesin e konstituimit: pa seanca pune, pa shqyrtim ligjesh, pa asnjë çështje tjetër të agjendës parlamentare. Megjithatë, sipas të dhënave të siguruara nga vetë Kuvendi, deri më 11 shtator, 52 nga 120 deputetë kishin ushtruar të drejtën për të angazhuar asistentë.

Kronologjia e punësimeve është e qartë. Deputetët u betuan më 6 gusht. Të nesërmen, më 7 gusht, 12 prej tyre u pajisën me ndihmës: katër nga Partia Demokratike e Kosovës, shtatë nga Aleanca dhe një nga Lëvizja Vetëvendosje. Gjatë ditëve të tjera të gushtit u angazhuan edhe 32 asistentë, ndërsa në dhjetë ditët e para të shtatorit hynë në punë tetë të tjerë.

Kostoja është e llogaritshme. Rroga e një zyrtari personal, sipas Kuvendit, është 972.4 euro bruto, pa përfshirë shtesën për përvojën e punës. Për një muaj, 52 asistentët i kushtojnë buxhetit të Kosovës mbi 50 mijë e 500 euro.

Kuvendi u shpall i konstituuar vetëm më 13 shtator, madje me një nënkryetar mangët, pasi PDK-ja tërhoqi kandidaten e saj dhe nuk mori pjesë në vazhdimin e seancës inauguruese. Më vonë po atë ditë, 62 deputetë zgjodhën Qeverinë e re të Kosovës, të katërtën e udhëhequr nga Albin Kurti i Lëvizjes Vetëvendosje.

Korniza rregullative e Kuvendit e lejon angazhimin e stafit politik, por e lidh atë me funksionin e deputetit. Rregullorja e punës përcakton se stafi politik i ofron mbështetje profesionale dhe teknike deputetit në ushtrim të funksionit të tij, ndërsa aspektet e tjera rregullohen me akt të veçantë të miratuar nga Kryesia e Kuvendit. Sipas rregullores për shtesa mbi pagën bazë për deputetët dhe asaj për klasifikimin e pagës për stafin mbështetës politik të Kuvendit, kontrata e zyrtarëve të deputetëve është e lidhur me mandatin e punëdhënësit politik.

Pikërisht kjo lidhje ngre pikëpyetje te njohësit e punës së Kuvendit. Naim Jakaj nga Instituti i Kosovës për Drejtësi dhe Eugen Cakolli nga Instituti Demokratik i Kosovës e vlerësojnë si të papërgjegjshëm dhe joetik angazhimin e asistentëve në një periudhë kur deputetët nuk kishin obligime parlamentare në të cilat asistentët do të mund t’i ndihmonin. Fakti që angazhimi është i rregulluar në aspektin legjislativ, thonë ata, nuk e justifikon veprimin.

Jakaj, në një prononcim për Radion Evropa e Lirë, kërkon që deputetët të cilët angazhuan asistentë para konstituimit të Kuvendit ta arsyetojnë nevojën reale për angazhimin e tyre dhe punën konkrete që është kryer. Ai kujton se, pavarësisht betimit, Kuvendi nuk ishte i konstituuar.