Mbi 2600 faqe kurrikula, asnjë përmendje e UÇK-së: analiza që ngre debat në arsim

Nga 489 rezultate të të nxënit në lëndën e historisë, asnjë nuk i dedikohet posaçërisht Ushtrisë Çlirimtare të Kosovës. Ky është përfundimi i një analize të publikuar nga Agon Ahmeti, njohës i arsimit dhe drejtor ekzekutiv i ETEA-s, i cili ka shqyrtuar mënyrën se si sistemi arsimor i Kosovës e trajton historinë e luftës së fundit.

Ahmeti thotë se ka analizuar 16 dokumente kurrikulare të Kosovës, duke përfshirë Kornizën Kurrikulare, Kurrikulat Bërthamë për tri nivelet e arsimit parauniversitar dhe 12 kurrikulat lëndore për klasat I-XII. Në mbi 2600 faqe tekst, shkruan ai në një postim në Facebook, nuk ka arritur të gjejë askund as emrin e plotë e as shkurtesën e Ushtrisë Çlirimtare të Kosovës.

Duke u ndalur te lënda e historisë, ai numëron gjithsej 489 rezultate të të nxënit, pra 489 tema, procese ose ngjarje konkrete që nxënësi pritet t'i njohë dhe t'i kuptojë. Sipas tij, vetëm tri prej tyre, ose 0.61 për qind, e prekin luftën çlirimtare, por pa kërkuar në mënyrë specifike njohjen e UÇK-së apo të figurave të saj kryesore. Pyetja që ia shtroi vetes, shpjegon ai, ishte se çfarë pritet të dijë një nxënës për UÇK-në pas 12 vitesh shkollimi.

Analiza vjen në një moment kur çështja është ngritur edhe në nivel administrativ. Pas ngjarjeve të rënda të ditëve të fundit të lidhura me historinë e Kosovës dhe luftën e UÇK-së, Drejtoria e Arsimit në Prishtinë kërkoi që ora e parë e mësimit t'i kushtohej UÇK-së, ndërsa dy ditë më vonë që flamuri i UÇK-së të vendosej në hyrje të shkollave publike.

Pikërisht këtu Ahmeti ngre shqetësimin kryesor: nëse UÇK-ja konsiderohet pjesë kaq e rëndësishme e historisë së Kosovës, pse njohja e saj në shkollë duhet të bëhet me vendime administrative të momentit, ad hoc. Ai kujton se kurrikula është baza mbi të cilën ndërtohen programet mësimore, tekstet shkollore dhe puna e mësimdhënësve në klasë, duke argumentuar se çështja nuk është pse UÇK-ja nuk përmendet në çdo klasë, por sa dhe si trajtohet atëherë kur kurrikula arrin te kjo periudhë historike.

Ministria e Arsimit dhe institucionet e tjera ende nuk kanë reaguar ndaj gjetjeve të prezantuara.