Mbi 20 mijë votues më shumë nga Kosova në listën e Serbisë, gjenden edhe emra të përsëritur

Para zgjedhjeve të 25 tetorit, lista zgjedhore e Serbisë përfshin 115.856 votues me adresë në Kosovë. Më 2023, po kjo listë numëronte 94.161 të tillë, një rritje prej mbi 20 mijë emrash.

Shifrat i ka nxjerrë në pah një hulumtim i Radios Evropa e Lirë (REL), i cili ka hasur në listë emra të përsëritur, gabime të ndryshme dhe mbi 3.800 regjistrime ku mungon emri i prindit. Në Mitrovicë, si votues figuron edhe një person që ka vdekur.

Ognjen Rashua, përfaqësues i opozitës në Komisionin për Rishikimin e Listës Zgjedhore, e shpjegon rritjen me rikthimin në evidencën e vendbanimit në Kosovë të personave të cilëve u kishte skaduar vendqëndrimi në Serbi. Megjithatë, ai paralajmëron se pasaktësitë hapin rrugë për abuzime. "Në të gjitha këto parregullsi mund të fshihen manipulime", ka deklaruar Rashua.

Më i kujdesshëm është Zoran Saviq nga organizata Aktiv. Ai kërkon transparencë për përbërjen e elektoratit, por nuk nxjerr përfundime pa prova. "Nuk pretendoj se janë votues fiktivë, nuk kam prova për këtë", ka thënë Saviq.

Autoritetet serbe e mbrojnë saktësinë e listës, por ministritë përgjegjëse nuk u janë përgjigjur pyetjeve për gabimet e evidentuara.

Votuesit nga Kosova do ta hedhin votën në 60 vendvotime të ngritura në Tutin, Rashkë, Kurshumli dhe Vranjë.