Mbeturinat nisin të grumbullohen sërish në Prizren, Suharekë, Malishevë e Rahovec

Grumbullimi dhe transportimi i mbeturinave ka rifilluar normalisht në Prizren, Suharekë, Malishevë dhe Rahovec, ka njoftuar kryeshefi ekzekutiv i Kompanisë Rajonale të Mbeturinave “Ekoregjioni”, Burim Shala.

Zgjidhja erdhi përmes një marrëveshjeje mes tri palëve: “Ekoregjionit”, Komunës së Prizrenit dhe Kompanisë për Menaxhimin e Deponive në Kosovë (KMDK). Sipas Shalës, marrëveshja synon tejkalimin e problemit me deponimin e mbeturinave, i cili kishte shkaktuar ndërprerjen e shërbimit në këto katër komuna. Nuk është bërë e ditur se çfarë parasheh konkretisht marrëveshja.

Shala tha se shërbimi do të vazhdojë normalisht në gjithë territorin ku operon kompania, si në zonat urbane, ashtu edhe në ato rurale. Ai u kërkoi falje qytetarëve dhe bizneseve për shqetësimet që u shkaktoi ndërprerja.

Kryeshefi i “Ekoregjionit” falënderoi për kontributin në zgjidhjen e situatës kryetarin e Prizrenit, Shaqir Totaj, nënkryetarin Kujtim Gashi, drejtorin e Shërbimeve Publike, Islam Ukimeri, si dhe menaxhmentin e KMDK-së.