"Maskat i kam qejf, i përdor për Halloween": mbrojtja e çuditshme e 32-vjeçarit për grabitjen në Paskuqan

Një maskë, një argjendari e grabitur dhe një shpjegim që tërhoqi vëmendjen: kjo është përmbledhja e dëshmisë me të cilën Argys Kalasi, 32 vjeç, u përpoq të bindte Gjykatën e Tiranës se nuk ka gisht në grabitjen e ndodhur në Paskuqan.

Gjykata nuk u bind. Ajo i ka caktuar 32-vjeçarit masën e sigurisë "arrest me burg". Kalasi ishte vënë në pranga dy ditë më parë, i akuzuar për grabitjen e një argjendarie në Paskuqan.

Para gjykatës, ai mohoi përfshirjen në ngjarjen e ndodhur më 5 gusht dhe pretendoi se nuk ka lidhje me maskën që autorët përdorën gjatë grabitjes. "Maskat i kam qejf dhe i përdor për Halloween. Pasi festoja, i hidhja poshtë. Kjo mund të jetë një nga ato maskat," deklaroi ai sipas dëshmisë së dhënë.

Kalasi refuzoi gjithashtu të tregojë se kush ishte personi tjetër që dyshohet se mori pjesë në grabitjen e argjendarisë.

Kalasi mbetet i dyshuar dhe deri në një vendim përfundimtar të gjykatës konsiderohet i pafajshëm.