Masakër në dy lokale në Afrikën e Jugut: 27 të vrarë brenda një nate

Shtatëmbëdhjetë veta të vrarë dhe 15 të plagosur në një lokal pranë Johannesburgut, e më pas, vetëm pak orë më vonë, edhe 10 të vdekur në Kejp Taun. Kjo është nata e së shtunës në Afrikën e Jugut, ku policia ka nisur një ndjekje të gjerë për autorët e dy sulmeve të veçanta me armë zjarri.

Sulmi më i përgjakshëm ndodhi të shtunën, rreth orës 21:30 me orën lokale, në një lokal në Wedela, një lagje periferike në distriktin West Rand, jashtë Johannesburgut. Sipas policisë së Afrikës së Jugut, tetë burra të paidentifikuar qëlluan fillimisht mbi klientët që po pinin jashtë lokalit, pastaj hynë brenda dhe vazhduan të shtinin mbi ata që ndodheshin atje.

"Dyshohet se klientët po pinin brenda dhe jashtë lokalit kur të dyshuarit mbërritën dhe hapën zjarr ndaj atyre që ishin jashtë. Më pas të dyshuarit hynë në lokal dhe vazhduan të qëllonin ndaj klientëve brenda", shkroi policia në një deklaratë të publikuar në rrjetin X.

Shërbimet e emergjencës konstatuan vdekjen e të 17 viktimave në vendngjarje. Pesëmbëdhjetë persona me plagë nga armë zjarri u dërguan në institucione shëndetësore për trajtim.

Sipas Shërbimit Policor të Afrikës së Jugut, sulmuesit nuk u mjaftuan me të shtënat. "Dyshohet se ata kontrolluan disa klientë dhe u morën telefonat celularë, para se të largoheshin nga vendngjarja me dy automjete të paidentifikuara", tha policia. Po sipas saj, të dyshuarit "raportohet se ishin të armatosur me pushkë AK-47 dhe pistoleta". Motivi i sulmit mbetet i panjohur dhe, sipas policisë, deri në këtë fazë nuk është arrestuar askush.

Në të njëjtën natë, në anën tjetër të vendit, gjakderdhja vazhdoi. Në orën 1:46 të mëngjesit, persona të armatosur hapën zjarr në një lokal argëtimi në Lwandle të Kejp Taunit, duke vrarë 10 veta dhe duke plagosur 11 të tjerë, sipas policisë. Autoritetet bënë të ditur se pesë prej viktimave ndërruan jetë në vendngjarje. Nuk dihet ende nëse dy sulmet kanë ndonjë lidhje me njëri-tjetrin.