Marta Kos në Procesin e Berlinit: Kosovës i kujton të drejtën ndërkombëtare pas vërejtjes për Specialen

Për Malin e Zi, vija e finishit. Për Serbinë, zgjedhjet. Për Shqipërinë, ritmi. Për Kosovën, e drejta ndërkombëtare. Kështu e ndau rrugën e rajonit drejt Bashkimit Europian komisionerja për Zgjerim e Komisionit Europian, Marta Kos, në fjalimin me të cilin u hap samiti i Procesit të Berlinit në Mal të Zi.

Para të pranishmëve dhe mediave, Kos foli për "momentet vendimtare" që vendet e rajonit kanë përpara. "Kemi përpara javë dhe muaj me momente vendimtare. Për Malin e Zi, momenti vendimtar do të jetë kalimi i vijës së finishit të procesit të anëtarësimit. Për Serbinë, moment vendimtar janë zgjedhjet të dielën e ardhshme. Për Shqipërinë, moment vendimtar është ruajtja e ritmit në rrugën drejt Europës. Dhe, sigurisht, edhe për Kosovën, një zgjedhje vendimtare është të vazhdojë të veprojë në përputhje me të drejtën ndërkombëtare dhe sundimin e ligjit", tha ajo.

Dallimi në ton ishte i qartë. Vendin nikoqir, Kos e veçoi si "një vend që është i vendosur të bëhet anëtar i Bashkimit Europian". Kosovës, përkundrazi, i kujtoi detyrën për t'u përmbajtur ndaj ligjit ndërkombëtar dhe sundimit të ligjit.

Kjo fjali nuk erdhi në zbrazëti. Ajo pasoi vërejtjet që Bashkimi Europian i kishte bërë Kosovës pas miratimit të ndryshimeve në Ligjin për Dhomat e Specializuara. Në një deklaratë të mëparshme, BE-ja kishte vlerësuar se ndryshimet e miratuara "bien ndesh me detyrimet ndërkombëtare të Kosovës ndaj BE-së".

Kos e mbylli fjalimin duke thënë se është mirë që udhëheqësit nga rajoni dhe nga i gjithë Procesi i Berlinit po mblidhen sot "në këtë vend të bukur".