Malisheva ndjek Skenderajn: Kuvendi Komunal miraton njëzëri deklaratën kundër Speciales

Pas Skenderajt, edhe Malisheva ka vendosur të flasë me zë institucional. Kuvendi Komunal i Malishevës miratoi të martën Deklaratën kundër Gjykatës Speciale, duke u bërë kështu komuna e dytë që ndërmerr një hap të tillë.

Kryetari i komunës, Ekrem Kastrati, njoftoi se deklarata kaloi me unitet të plotë të anëtarëve të Kuvendit Komunal. Sipas tij, historia e UÇK-së nuk mund të ndryshohet nga asnjë aktgjykim, ndërsa lufta e saj ishte për lirinë dhe çlirimin e Kosovës.

Në qëndrimin e tij, Kastrati lidhi vendimin me sakrificën e vendorëve gjatë luftës: "Malisheva e njeh mirë çmimin e kësaj lirie, përmes dëshmorëve, martirëve, invalidëve, veteranëve dhe familjeve që sakrifikuan gjithçka për të. Prandaj, të bashkuar, nuk mund të pajtohemi me asnjë narrativë që synon ta njollosë karakterin çlirimtar të UÇK-së dhe sakrificën e popullit tonë. UÇK-ja është dhe do të mbetet krenaria jonë kombëtare!"

Me miratimin në Malishevë, deklarata kundër Speciales ka marrë tashmë mbështetjen e dy kuvendeve komunale; i pari ishte ai i Skenderajt.