Mali i Zi nën flakë: zjarre në disa komuna, avionët dhe helikopterët në betejë me flakët

Zjarret kanë përfshirë mbrëmjen e sotme disa zona të Malit të Zi, por pjesa më e madhe e vatrave janë vënë nën kontroll, njoftoi drejtori i përgjithshëm i Drejtoratit për Mbrojtje dhe Shpëtim pranë Ministrisë së Punëve të Brendshme (MPB), Miodrag Bešović.

Sipas të dhënave të Qendrës Operative-Komunikuese 112 të MPB-së, situata mbetet aktive në disa fronte. Në komunën e Herceg Novit është ende aktiv zjarri në lokacionin Baošići (Bigovica), ndërsa në komunën e Ulqinit zjarri pranë liqenit të Shasit është vënë nën kontroll. Në Kolashin flakët vazhdojnë në zonën e Maganikut, teksa zjarri në Crni Vrh, në Velje Duboko, është nën kontroll.

Në territorin e Kryeqytetit Cetinje, zjarri në zonën e Bijelih Poljana është nën kontroll, po ashtu edhe vatrat në lokacionet Klopot, Komani dhe pranë liqenit të Rikavcit në territorin e Podgoricës. Zjarri në Ponikvice, në komunën e Danilovgradit, është gjithashtu nën kontroll, ndërsa në Bar mbetet aktiv zjarri në Lisinj.

Për të mbajtur situatën nën kontroll janë angazhuar mjete të konsiderueshme ajrore. Gjatë ditës, avionët e MPB-së së Malit të Zi operuan në disa lokacione — në Maganik të komunës së Kolashinit, në malin Zeletin në Andrijevicë dhe në Bijele Poljane në territorin e Cetinjes — duke realizuar 24 cikle dhe duke hedhur 72 tonë ujë.

Në betejë u përfshinë edhe helikopterët e Ushtrisë së Malit të Zi. "Në shuarjen e zjarreve u angazhuan edhe helikopterët e Ushtrisë së Malit të Zi, të cilët vepruan në zonën e komunës së Herceg Novit, në Đenoviće, si dhe në zonën e Podgoricës, në lokacionet Klopot dhe Slacko selo, dhe gjatë ditës së sotme realizuan gjithsej 34 fluturime, me 34 tonë ujë të hedhur", tha Bešović.

Ai theksoi se Ministria e Punëve të Brendshme, përmes Drejtoratit për Mbrojtje dhe Shpëtim dhe Qendrës Operative-Komunikuese 112, po e ndjek në vazhdimësi situatën dhe po i drejton kapacitetet e disponueshme drejt lokacioneve më të rrezikuara.

Bešović u bëri thirrje qytetarëve të tregohen të kujdesshëm në kushtet e temperaturave të larta dhe të bimësisë së thatë. "MPB-ja edhe një herë u bën thirrje qytetarëve të jenë të ndërgjegjshëm dhe të përmbahen nga të gjitha aktivitetet që mund të çojnë në shpërthimin dhe përhapjen e zjarreve, veçanërisht duke pasur parasysh temperaturat e larta dhe bimësinë e thatë. Në rast se vërejnë zjarr, qytetarët ftohen që pa vonesë të telefonojnë numrin 112 dhe të japin informacione sa më të sakta për vendndodhjen e zjarrit", tha ai.