Majko për verdiktin e Hagës: "Kam një ndjenjë pesimizmi, historinë po na e deformojnë"

"Sot kanë parë të gjithë njerëz duke qarë, fëmijë dhe ish-ushtarë të UÇK-së." Me këtë tablo e ka përshkruar Pandeli Majko, ish-kryeministri i Shqipërisë gjatë viteve të Luftës së Kosovës, ditën e verdiktit të Gjykatës së Hagës.

Në një deklaratë për Top Channel, Majko e cilësoi vendimin e sotëm një akt dramatik që, sipas tij, nuk e ndryshon historinë, por rrezikon ta deformojë perceptimin për të.

"Dëshiroj të them që, megjithëse dëgjoj se UÇK-ja doli e pastër, kam një ndjenjë pesimizmi. Është disa herë që përpiqen të na deformojnë historinë. Nuk mund të thuash doli nga kjo histori e pastër UÇK-ja, që doli e papërlyer. Është fakt historik që UÇK-së ose i janë vrarë, ose i janë dënuar. Kjo është dramë dhe duhet vlerësuar thellësia e saj", tha ai.

Megjithë emocionet, ish-kryeministri shqiptar u bëri thirrje Kosovës dhe Shqipërisë të shmangin çdo përplasje me drejtësinë.

"Ky vendim dramatik i Hagës na bëri të qartë se Kosova nuk ka tjetër veç Shqipërisë dhe Shqipëria nuk ka tjetër veç Kosovës. Sot kanë parë të gjithë njerëz duke qarë, fëmijë dhe ish-ushtarë të UÇK-së. Drama nga pikëpamja njerëzore është e jashtëzakonshme. Nuk ka nevojë të qajnë, por të kenë një qëndrim dinjitoz. Nuk është i fuqishëm ai që shan një vendim gjykate. Çdo inat karshi saj më duket dobësi", u shpreh Majko.

Ai theksoi se beteja juridike nuk ka mbaruar me vendimin e shkallës së parë dhe kërkoi që ai të lexohet përtej fatit individual të të dënuarve.

"Tani është edhe Apeli dhe mendoj se Kosova dhe Shqipëria duhet ta vlerësojnë këtë jo si akt personal, por si akt që na ka goditur të gjithëve. Në luftë është shumë e vështirë të ndash një akt personal nga një akt kolektiv", tha ai.

Gjykata Speciale u krijua në vitin 2015 me vendim të Kuvendit të Kosovës, pas ndryshimeve kushtetuese dhe marrëveshjeve me Bashkimin Evropian. Për Majkon, pranimi i saj ishte një çmim që Kosova zgjodhi ta paguante në rrugën drejt konsolidimit ndërkombëtar.

"Mënyra se si u formua ky vendim ishte si një çmim. Mendoj se akti i krijimit të kësaj gjykate kërkoi një trimëri të caktuar dhe, në fund të fundit, askush nuk mund të akuzojë nga pikëpamja ndërkombëtare apo historia. Ky vendim u mor se subkoshienca e shqiptarit është e vetëdijshme se gjithçka është paguar ose me vrasje, ose me burgosje. Nuk na zhgënjyen", tha ai.

Për ish-kryeministrin shqiptar, vendimi i sotëm bart edhe një peshë personale: në vitet e luftës ai drejtonte qeverinë e Shqipërisë, ndërsa Hashim Thaçi ishte një nga udhëheqësit e asaj periudhe.