Lokali në fshatin Mjekës shërbente për doza kokaine, tre të arrestuar në Elbasan

Kamerieri i lokalit, një 18-vjeçar, dyshohet se ndante në doza kokainë dhe kanabis pikërisht në ambientet ku punonte, në fshatin Mjekës të Elbasanit. Policia e Shtetit njoftoi finalizimin e operacionit antidrogë të koduar "Roli", me arrestimin e tre shtetasve.

Sipas policisë, të arrestuar janë D. R., 26 vjeç, shtetasi që kishte marrë me qira lokalin e përshtatur për këtë veprimtari kriminale, dhe L. Q., 18 vjeç, i punësuar si kamerier në të, që të dy banues në fshatin Mjekës. I treti është E. Q., 24 vjeç, vëllai i 18-vjeçarit, i arrestuar për veprat penale "Prodhimi dhe shitja e narkotikëve" dhe "Prodhimi, mbajtja, blerja apo shitja pa leje e armëve të ftohta".

Operacioni erdhi si rezultat i veprimeve intensive hetimore dhe operacionale të specialistëve të Seksionit për Hetimin e Narkotikëve, në bashkëpunim me Seksionin për Mbështetjen Operacionale të Hetimit, të drejtuara nga Prokuroria e Elbasanit. Qëllimi, sipas policisë, ishte dokumentimi i veprimtarisë kriminale të tre shtetasve, të cilët dyshohet se në bashkëpunim shitnin lëndë narkotike në doza.

Gjatë operacionit u konstatua se lokali në fshatin Mjekës ishte vënë në dispozicion të përgatitjes, ndarjes në doza dhe shitjes së kokainës dhe cannabis sativa. Në kontrollet e kryera në ambientet e lokalit u gjetën doza të këtyre lëndëve, bashkë me mjetet që shërbenin për përgatitjen e tyre.

Kontrolli vijoi më pas në banesën e 18-vjeçarit, ku, sipas policisë, u gjetën sasi dhe doza të lëndës së dyshuar narkotike cannabis sativa, si edhe një shkop metalik, që dyshohet se posedoheshin nga vëllai i tij, E. Q.

Në total janë sekuestruar dhjetëra doza të lëndëve narkotike, 6 grirëse materiali bimor, 3 peshore elektronike, 2 celularë dhe 1 shkop metalik. Materialet procedurale iu referuan Prokurorisë, për veprime të mëtejshme.