ReklamëHapësirë reklame
ReklamëHapësirë reklame
Reklamë
Një kompani amerikane e paguar nga Qeveria e Serbisë 65 mijë dollarë në muaj ka kontaktuar Richard Grenellin dhe ka ndërmjetësuar një intervistë të Vuçiqit që përfundoi në profilin e Donald Trumpit në Truth Social. Këto aktivitete dalin nga raportet e dorëzuara në Departamentin e Drejtësisë së SHBA-së.
Në ditën kur intervista e presidentit serb Aleksandar Vuçiq u publikua në portalin konservator amerikan Breitbart, lobistët e Beogradit i dërguan një mesazh Donald Trumpit për t'ia tërhequr vëmendjen. Po atë ditë, pas orës 14:00 sipas kohës lindore në SHBA, presidenti amerikan e shpërndau lidhjen e intervistës në rrjetin e tij social, Truth Social.
Ky episod figuron në raportet periodike që kompania amerikane e lobimit Valcour, e angazhuar dhe e paguar nga Qeveria e Serbisë, ka dorëzuar në Departamentin e Drejtësisë së Shteteve të Bashkuara. Të njëjtat dokumente zbulojnë se kompania ka pasur kontakte edhe me Richard Grenellin, ish-emisarin amerikan për Serbinë dhe Kosovën, i cili aktualisht mban detyrën e të dërguarit për misione speciale.
Sipas raportit që mbulon periudhën nga shtatori 2025 deri në mars 2026, përfaqësuesit e Valcourit kanë kontaktuar zyrtarë të Departamentit të Shtetit, si dhe Grenellin, i cili më herët ka shërbyer si i dërguar amerikan për dialogun Kosovë-Serbi. Gjatë së njëjtës periudhë, kompania ka punuar për promovimin e Vuçiqit në qarqet politike dhe mediatike të Washingtonit.
Kontakti me Grenellin nuk është një veprim i izoluar, por pjesë e një fushate më të gjerë lobimi të Beogradit në kryeqytetin amerikan. Grenell ka mbajtur lidhje të afërta me udhëheqjen serbe dhe në vitet e fundit ka qenë i përfshirë në çështjet e marrëdhënieve SHBA-Serbi, si dhe në dialogun Kosovë-Serbi.
Raporti tregon gjithashtu se Valcour është marrë me organizimin e takimeve të ministrit të Jashtëm serb, Marko Gjuriq, me organizata të njohura hebraike në Washington, ndërsa ka zhvilluar kontakte me zyrtarë amerikanë për marrëdhëniet dypalëshe mes Serbisë dhe Shteteve të Bashkuara.
Ndërmjetësimi për intervistën me Breitbart zë një vend të veçantë në dokumente. Nga 1 prilli deri më 31 maj, ditën kur intervista doli në publik, përfaqësuesit e Valcourit kishin qenë disa herë në kontakt me Matthew Boylen, shefin e zyrës së Breitbart në Washington. Mesazhi drejtuar Trumpit në ditën e publikimit është regjistruar në raport si aktivitet më vete.
Në intervistë, Vuçiqi i bëri lavde Trumpit, duke thënë se presidenti amerikan është shumë më i popullarizuar në Serbi se çdo lider tjetër amerikan, sepse, sipas tij, është "pragmatik dhe racional".
Marrëveshja mes Beogradit dhe Valcourit daton që nga nëntori i vitit 2024, me një pagesë prej 65 mijë dollarësh në muaj. Raporti më i ri, për periudhën nga marsi deri në shtator të vitit 2026, tregon se kompania i ka faturuar Serbisë 794.084,79 dollarë, shumë që përfshin tarifën mujore dhe shpenzime shtesë ligjore.
Në këtë periudhë, lobistët kanë kontaktuar zyrtarë të Departamentit të Shtetit dhe anëtarë të Kongresit, kanë përcjellë deklarata të Vuçiqit kundër antisemitizmit dhe u janë drejtuar mediave amerikane me propozime për tema dhe intervista. Promovimi i EXPO 2027 përshkruhet si një prej objektivave të kontratës, por aktivitetet e kompanisë kanë shkuar përtej tij.
Kontratën me Qeverinë e Serbisë e ka nënshkruar Matthew Mouers, drejtori i Valcourit, i cili më parë ka punuar në administratën e Trumpit si këshilltar i lartë i Shtëpisë së Bardhë pranë Departamentit të Shtetit. Mouers ka qenë figurë kryesore në fushatën e Trumpit, pjesë e ekipit tranzitor para mandatit të dytë dhe i angazhuar në mbledhjen e fondeve për komitetin inaugurues të Trumpit dhe J.D. Vance. Ai vazhdon të jetë i angazhuar në Komitetin Kombëtar Republikan.
Valcour nuk është e vetme: ajo është njëra nga disa kompani që lobojnë në Washington për interesat e Serbisë.
Dy burra nga fshati Sinë dyshohet se u përplasën me dhunë me dy policë ndërsa po shoqëroheshin në komisariat. Në të njëjtin bulevard të Peshkopisë, një 36-vjeçar u kap me thikë dhe shufër metalike.
