Lista Serbe i paraqet shefit të ri të EULEX-it ankesat për "dhunë institucionale"

Lista Serbe e ktheu takimin njohës me shefin e ri të EULEX-it, Antero Lopes, në një listë ankesash: partia thotë se i paraqiti atij shqetësimet për atë që e cilëson si "dhunë institucionale ndaj popullit serb" në Kosovë.

Takimi u zhvillua sot mes Lopesit dhe kryetarit të Listës Serbe, Zlatan Elek, së bashku me ekipin e tij. Në deklaratën e vet, shefi i misionit e përshkroi bisedën si njohëse dhe të përqendruar te sundimi i ligjit: "Sot zhvillova një takim njohës me kryetarin e “Srpska Lista”-s, Zlatan Elek, dhe ekipin e tij, me të cilët diskutova çështje që lidhen me sundimin e ligjit. Në takim, rikonfirmova përkushtimin e vazhdueshëm të Misionit për të mbështetur sigurinë dhe të drejtat e njeriut për të gjitha komunitetet në Kosovë."

Versioni i Listës Serbe është shumë më i ashpër. Në njoftimin e saj, partia pretendon se ka presione dhe veprime të kundërligjshme ndaj përfaqësuesve serbë dhe organeve komunale: "Përfaqësuesit e Listës Serbe theksuan veçanërisht dhunën e vazhdueshme institucionale ndaj popullit serb, si dhe presionet dhe veprimet e kundërligjshme ndaj përfaqësuesve serbë dhe organeve komunale, duke theksuar se kjo cenon më tej sigurinë juridike, funksionimin e vetëqeverisjeve lokale dhe besimin e qytetarëve në institucione."

Partia shkon edhe më tej, duke fajësuar mungesën e reagimit nga institucionet: "Gjatë takimit u theksua se shkelja e të drejtave të serbëve, mosrespektimi i ligjit dhe keqpërdorimi i mekanizmave institucionalë janë bërë dukuri e rregullt, ndërsa mungesa e një reagimi adekuat nga institucionet përgjegjëse inkurajon më tej një sjellje të tillë dhe thellon ndjenjën e pasigurisë te populli ynë."

Takimi është pjesë e kontakteve që shefi i ri i EULEX-it po zhvillon me përfaqësuesit politikë dhe institucionalë në Kosovë.