"Liri për çlirimtarët": marshim në sheshin "Skënderbej" në prag të verdiktit të Hagës

Një marshim mbështetës për ish-krerët e UÇK-së që ndodhen në Hagë do të mbahet të martën, më 15 shtator, në qendër të Shkupit. Vendtakimi është sheshi "Skënderbej", ora 18:00, dhe thirrja vjen nga Forumi Rinor Shqiptar, organizatori i tubimit.

Në njoftimin e tij, ky forum e ka cilësuar tubimin aktivitet sensibilizues, të mbajtur pikërisht para shpalljes së verdiktit përfundimtar. "LIRI PËR ÇLIRIMTARËT! Forumi Rinor Shqiptar organizon aktivitet sensibilizues në mbështetje të ish-krerëve të UÇK-së, të cilët ndodhen në Hagë, në prag të verdiktit përfundimtar", thuhet në njoftim.

Organizatorët kanë ftuar të gjithë shqiptarët të dalin në shesh, me kërkesën për lirimin e asaj që e quajnë katërshja e UÇK-së. "Nesër ftojmë të gjithë shqiptarët të mblidhemi për t'i dhënë një mesazh gjykatës se ata të cilët u vunë në shërbim të lirisë nën emblemën e UÇK-së nuk ka gjykatë që i gjykon sepse UÇK-ja është e pastër. Nga Shkupi do të përcjellim zërin tonë të fuqishëm të solidaritetit dhe mbështetjes", thuhet në ftesën e tyre.

Sipas organizatorëve, UÇK-ja është pjesë e historisë shqiptare. "UÇK-ja është pjesë e historisë dhe lirisë së shqiptarëve. Luftëtarët e lirisë meritojnë vetëm drejtësi. Të gjithë bashkë për drejtësi. Të gjithë bashkë për çlirimtarët!", është thënë tutje në njoftim.

Njoftimi i organizatorëve nuk i përmend me emër ish-krerët e UÇK-së që ndodhen në Hagë dhe as datën e saktë kur pritet aktgjykimi. Të akuzuarit mbeten të pafajshëm derisa gjykata të marrë vendim përfundimtar.