Ligji për Specialen: rigjykimet në Kosovë, falja te presidenti dhe tavan 15 vite

Rigjykimet e mundshme të Dhomave të Specializuara të Kosovës në Hagë të zhvillohen në gjykatat e rregullta të Kosovës. Ky është, sipas deputetit të PDK-së Eman Rrahmani, një nga synimet kryesore të ligjit që kërkon ndryshime në proceset e zhvilluara në Hagë.

Rrahmani e lidhi këtë skenar drejtpërdrejt me vendimin që pritet nga Gjykata e Apelit. "Ajo që synohet me këtë ligj, fillimisht, në qoftë se Gjykata e Apelit vazhdon me qasjen e njëjtë të padrejtësisë që ka vepruar në shkallën e parë, në qoftë se e rikthen në rigjykim, në shkallën tjetër t’u kthehen këto lëndë gjykatave në Kosovë. Ankesat e të dënuarve të bëhen dhe të kenë të drejtë që ky rast të bëhet tek Gjykata Supreme e Republikës së Kosovës, gjykata të rregullta", deklaroi ai.

Sipas deputetit, zinxhiri i ankimit nuk ndalet te Supremja: pas saj, fjalën do ta kishte Gjykata Kushtetuese. Ligji prek edhe një kompetencë tjetër të ndjeshme, atë të faljes së të dënuarve, e cila do t'i kalonte presidentit të vendit. "Pika tjetër është që, pas asaj, të ketë të drejtën Gjykata Kushtetuese. Faljen e të dënuarve nga ky proces ta ketë të drejtën presidenti i vendit dhe jo përfaqësuesi që është në Gjykatën Speciale, siç është për momentin me Ligjin për Dhomat e Specializuara", tha Rrahmani.

Elementi i tretë ka të bëjë me masën e dënimeve. Deputeti i PDK-së tha se ligji synon vendosjen e një kufiri maksimal për dënimet në këto procese: "Që të mos ketë dënime mbi 15 vite në këto procese".