Ligji për Specialen në komision: Gruda thotë se ndryshimet mbrojnë luftën e UÇK-së

Komisioni për Legjislacion, Mandate, Imunitete dhe Rregulloren e Kuvendit të Kosovës ka nisur mbledhjen me një pikë të vetme në rend dite: votimin e ndryshimit dhe plotësimit të Ligjit për Dhomat e Specializuara dhe Zyrën e Prokurorit të Specializuar.

Në mbledhje, anëtari i komisionit Përparim Gruda e paraqiti projektligjin si nismë të Partisë Demokratike të Kosovës (PDK). Ai tha se ligji e mbron luftën e UÇK-së dhe u bëri thirrje kolegëve të tij për unitet: "Shpresoj që ta kalojmë pa ndasi."

Sipas Grudës, bëhet fjalë për një ligj që ndryshon atë për dhomat e specializuara dhe që ka peshë të veçantë për mbrojtjen e standardeve të drejtësisë. "Përmes këtij ligji ne mbrojmë luftën e drejtë të UÇK-së", deklaroi ai.

Miratimi në komision pritet t'i hapë rrugë procedimit të mëtejmë parlamentar të projektligjit. PDK shpreson që ai të miratohet po sot në seancën plenare të Kuvendit, ku shqyrtimi i parë i ligjit është pika e parë e rendit të ditës në seancën e orës 9:00.

Rezultati i votimit në komision ende nuk është bërë i ditur.