Ligji për Specialen mbetet jashtë paketës së Qeverisë, PDK mblidhet urgjentisht

Qeveria e Kosovës procedoi sot në Kuvend 11 projektligje, por projektligji për ndryshimin e Ligjit për Dhomat e Specializuara nuk figuron në listë, sipas deputetes së Partisë Demokratike të Kosovës (PDK), Blerta Deliu-Kodra.

Reagimi i opozitës erdhi menjëherë. Deliu-Kodra paralajmëroi në emisionin "DPT te Fidani" në Klan Kosova se partia e saj do të mbajë një mbledhje urgjente nesër, në orët e para të mëngjesit. "Pas kësaj informate që kemi marrë, Partia Demokratike e Kosovës do të mblidhet nesër në mëngjes, do të ketë mbledhje në orët e hershme të mëngjesit", tha ajo.

Deputetja nuk e kurseu ekzekutivin. "Është po e them, është e paprecedentë", deklaroi ajo, duke shtuar se vendimi "e para është fyerje me nevojën emergjente që sot e ka Kosova, është shpërfillje ndaj situatës politike që e kemi, është shpërfillje ndaj mijëra protestuesve të cilët protestojnë tash e 14 net në kryeqytetin e Kosovës".

Sipas Deliu-Kodrës, edhe mënyra se si mbërriti lajmi ngjalli pikëpyetje. Njoftimi zyrtar në postën elektronike të deputetëve erdhi pas orës 15:00, gjë që, siç tha ajo, shkaktoi habi dhe dyshime brenda grupit parlamentar.

Deliu-Kodra kujtoi se iniciativa ligjore e PDK-së për ndryshimin e ligjit për Specialen i është përcjellë zyrtarisht Qeverisë nga Kuvendi që nga data 23. Në këtë kohë, sipas saj, Ministria e Drejtësisë ka pasur gjithë hapësirën e nevojshme për ta proceduar me urgjencë.

Nuk dihet ende pse projektligji mbeti jashtë paketës së dërguar sot në Kuvend. Vendimet e para të PDK-së pritet të dalin nga mbledhja e nesërme.