Ligji për Gjykatën Speciale del i pari në Kuvend, protestuesit kalojnë natën para sallës

Ndryshimet në ligjin për Dhomat e Specializuara dhe Zyrën e Prokurorit të Specializuar hapin të hënën seancën e Kuvendit të Kosovës. Në rendin e ditës me 22 pika që ka publikuar Kuvendi, shqyrtimi i parë i Projektligjit nr. 11/L-001 për ndryshimin dhe plotësimin e Ligjit nr. 05/L-053 renditet i pari. Seanca nis në ora 09:00.

Kërkesën për mbledhjen e seancës e dorëzoi të dielën grupi parlamentar i Lëvizjes Vetëvendosje. Një orë më herët, në ora 08:00, mblidhet Komisioni për Legjislacion, që ka po këtë projektligj në rendin e vet të ditës.

Presioni ndihet edhe jashtë sallës. Të dielën, disa protestues u mblodhën para Kuvendit dhe paralajmëruan se do të qëndrojnë aty gjithë natën. Në Prishtinë mbahen protesta çdo ditë që nga shpallja e aktgjykimit ndaj ish-drejtuesve të UÇK-së, ndërsa organizata e ish-pjesëtarëve të UÇK-së ka paralajmëruar përshkallëzim të veprimeve nëse partitë politike nuk arrijnë marrëveshje për ndryshimin e ligjit.

Iniciativa vjen nga Partia Demokratike e Kosovës (PDK), e cila kërkoi ndryshimet pasi Dhomat e Specializuara në Hagë dënuan katër ish-drejtues të UÇK-së me gjithsej 81 vjet burg për krime lufte. Amendamentet parashikojnë kufizimin e mandatit të gjykatës vetëm te krimet e përmendura në raportin e Dick Martyt, si dhe vendosjen e një monitorimi ndërkombëtar mbi punën e saj. Sipas këtyre ndryshimeve, krimet e luftës për të cilat u dënuan katër ish-drejtuesit do të gjykoheshin në Kosovë.

Qeveria e Kosovës e miratoi iniciativën e PDK-së të premten në mbrëmje dhe vlerësoi se ajo nuk bie ndesh me ligjin.

Debati për gjykatën është lidhur ngushtë me një tjetër afat që i rri mbi kokë Kuvendit: deri më 6 tetor duhet të zgjidhet presidenti. Në të kundërt, Kuvendi shpërndahet dhe zgjedhjet e reja duhet të mbahen brenda 45 ditëve. Të shtunën, kryeministri në detyrë, njëherësh kryetar i Vetëvendosjes, zhvilloi takime të veçanta me krerë partish, mes tyre edhe me kryetarin e PDK-së. Pas takimit, kryetari i PDK-së deklaroi se partia e tij është e gatshme për zgjedhjen e presidentit, por vetëm pasi Kuvendi të ketë miratuar amendamentet e propozuara prej saj për ligjin e Dhomave të Specializuara.

Pas ligjit për Gjykatën Speciale, rendi i ditës përfshin ratifikimin e marrëveshjes së kredisë me Agjencinë Franceze për Zhvillim për Lojërat Mesdhetare XXI në Kosovë, tri marrëveshje financiare me Bashkimin Evropian për programet IPA 2021, IPA 2022 dhe IPA 2026-2027, zgjedhjen e Auditorit të Përgjithshëm, të anëtarëve dhe kryesuesit të Bordit të Zyrës së Rregullatorit të Energjisë dhe të dy anëtarëve joekzekutivë të Bordit të Bankës Qendrore. Deputetët do të shqyrtojnë gjithashtu një paketë projektligjesh për drejtësinë, nga verifikimi dhe konfiskimi i pasurisë së pajustifikueshme te statusi dhe përgjegjësia disiplinore e gjyqtarëve dhe prokurorëve, si dhe ndryshimet në buxhetin e vitit 2026 dhe ligjin për menaxhimin e resurseve ujore, që mbyll listën.